ஐ.பி.எல்: இன்று இரண்டு லீக் போட்டிகள்!

விறுவிறுப்புக்கு பஞ்சமில்லாமல் நடைபெற்றுவரும் ஐ.பி.எல். ரி-20 தொடரில், இன்று (வியாழக்கிழமை) இரண்டு லீக் போட்டிகள் நடைபெறவுள்ளன.

இதில் முதலாவதாக மாலை 3.30மணிக்கு நடைபெறவுள்ள இப்போட்டியில், மும்பை இந்தியன்ஸ் அணியும் ராஜஸ்தான் றோயல்ஸ் அணியும் மோதவுள்ளன.

டெல்லி மைதானத்தில் தொடரின் 24ஆவது லீக் போட்டியாக நடைபெறவுள்ள இப்போட்டியில், மும்பை அணிக்கு ரோஹித் சர்மாவும் ராஜஸ்தான் அணிக்கு சஞ்சு சம்சனும் தலைமை தாங்கவுள்ளனர்.

நடப்பு தொடரில் மும்பை அணி, 4 புள்ளிகளுடன் நான்காவது இடத்திலும் ராஜஸ்தான் அணி 4 புள்ளிகளுடன் ஏழாவது இடத்திலும் உள்ளன.

இரு அணிகளும் இதுவரை 23முறை மோதியுள்ளன. இரு அணிகளும் தலா 11 வெற்றிகளை பதிவுசெய்துள்ளன. ஒரு போட்டிக்கு முடிவு இல்லை.

அடுத்ததாக நடைபெறும் தொடரின் 25ஆவது லீக் போட்டியில், டெல்லி கெபிடல்ஸ் அணியும் கொல்கத்தா நைட்ரைடர்ஸ் அணியும் பலப்பரீட்சை நடத்தவுள்ளன.

அஹமதாபாத் மைதானத்தில் நடைபெறவுள்ள இப்போட்டியில், டெல்லி அணிக்கு ரிஷப்பந்தும் கொல்கத்தா அணிக்கு ஓய்ன் மோர்கனும் தலைமை தாங்கவுள்ளனர்.

நடப்பு தொடரில், டெல்லி அணி 8 புள்ளிகளுடன் மூன்றாவது இடத்திலும் கொல்கத்தா அணி 4 புள்ளிகளுடன் ஐந்தாவது இடத்திலும் உள்ளன.

இரு அணிகளும் இதுவரை 26முறை மோதியுள்ளன. இதில் 14முறை கொல்கத்தா அணியும் 11முறை டெல்லி அணியும் வெற்றிபெற்றுள்ளன.