2020ஆம் ஆண்டு யு.இ.எஃப்.ஏ யூரோ கிண்ண கால்பந்து தொடர், தற்போது விறுவிறுப்பான கட்டத்தை எட்டியுள்ளது.
அந்த வகையில் தற்போது இந்த தொடரில், ரவுண்ட்-16 சுற்றுப் போட்டிகள் இரசிகர்களை கொண்டாட வைத்து வருகின்றது.
இதன்படி உள்ளூர் நேரப்படி இன்று (புதன்கிழமை) நடைபெற்ற போட்டியில், பெல்ஜியம் அணியும் போர்த்துக்கல் அணியும் மோதின.
லா கார்டூஜா விளையாட்டரங்கில் நடைபெற்ற போட்டியில், பெல்ஜியம் அணி, 1-0 என்ற கோல் கணக்கில் வெற்றிபெற்றது.
இதில் பெல்ஜியம் அணி சார்பில், தோர்கன் ஹசார்ட் போட்டியின் 43ஆவது நிமிடத்தில் அணிக்காக வெற்றி கோலை புகுத்தினார்.
இதற்கமைய காலிறுதிக்குள் நுழைந்த பெல்ஜியம் அணி, எதிர்வரும் ஜுலை 3ஆம் திகதி நடைபெறவுள்ள போட்டியில் இத்தாலி அணியுடன் பலப்பரீட்சை நடத்தவுள்ளது.
