லங்கா பிரீமியர் லீக் (எல்.பி.எல்.) ரி-20 தொடரின், 17ஆவது லீக் போட்டியில் கொழும்பு ஸ்டார்ஸ் அணியை ஜப்னா கிங்ஸ் அணி 102 ஓட்டங்களால் வெற்றிபெற்றுள்ளது.
கொழும்பு ஆர்.பிரேமதாஸ மைதானத்தில் நடைபெற்ற இந்தப்போட்டியில், நாணயச் சுழற்சியில் வெற்றிபெற்ற ஜப்னா கிங்ஸ் அணி, முதலில் துடுப்பெடுத்தாடத் தீர்மானித்து, 20 ஓவர்கள் நிறைவில் 5 விக்கெட்டுகளை இழந்து 193 ஓட்டங்களைப் பெற்றுக்கொண்டது.
அணியின் அதிகபட்ச ஓட்டங்களாக, டொம் கட்மோர் 92 ஓட்டங்களையும் உபுல் தரங்க 37 ஓட்டங்களையும் எடுத்திருந்தனர்.
கொழும்பு ஸ்டார்ஸ் அணியின் நவீன் உல் ஹக் 3 விக்கெட்டுகளையும் துஸ்மந்த சமீர மற்றும் ஜெப்ரி வண்டர்சே ஆகியோர் தலா ஒரு விக்கெட்டினையும் வீழ்த்தினர்.
அதனையடுத்து 194 ஓட்டங்கள் என்ற வெற்றி இலக்கை நோக்கிக் களமிறங்கிய கொழும்பு ஸ்டார்ஸ் அணி, ஜப்னா கிங்ஸ் அணியின் பந்துவீச்சைச் சமாளிக்கமுடியாது தடுமாறி, 15.5 ஓவர்களிலேயே 91 ஓட்டங்களுக்கு ஆட்டமிழக்க, ஜப்னா கிங்ஸ் அணி 102 ஓட்டங்களால் வெற்றியைத் தனதாக்கிக்கொண்டது. கொழும்பு ஸ்டார்ஸ் அணியின் டொம் பன்ரொன் 30 ஓட்டங்களை எடுத்தார்.
ஜப்னா கிங்ஸ் அணியின் ஜெய்டன் சீல்ஸ் 4 விக்கெட்டுகளையும், இந்தத் தொடரில் தனது முதலாவது போட்டியில் விளையாடிய வியாஸ்காந்த் 3 விக்கெட்டுகளையும் மகேஸ் தீக்சன 2 விக்கெட்டுகளையும் கைப்பற்றினர். போட்டியின் சிறப்பாட்டக்காரராக ஜப்னா கிங்ஸ் அணியின் டொம் கட்மோர் தொிவானார்.
இந்த வருட எல்.பி.எல். தொடரில் 7 போட்டிகளில் விளையாடியுள்ள ஜப்னா கிங்ஸ் அணி 6 இல் வெற்றிபெற்று 12 புள்ளிகளோடு புள்ளிப் பட்டியலில் முதலிடத்திலுள்ளது.
