நாட்டின் ஜனாதிபதியுடன் பேசாமல் அமெரிக்க ஜனாதிபதி அவர்களை அழைத்துப்பேசுவார் என்ற நினைப்பில் தமிழ் தேசிய மக்கள் முன்னணியினர் உள்ளனரோ தெரியாது என மிழ் தேசிய கூட்டமைப்பின் மட்டக்களப்பு மாவட்ட நாடாளுமன்ற உறுப்பினர் இரா.சாணக்கியன் தெரிவித்தார்.
மட்டக்களப்பில் இடம்பெற்ற நிகழ்வில் கலந்து கொண்டு கருத்து தெரிவிக்கும் போதே அவர் இவ்வாறு தெரிவித்துள்ளார்.
தொடர்ந்து கருத்து தெரிவித்த அவர் “மாகாணசபைகளுக்கு வழங்கப்பட்டவைகளில் கல்வி தொடர்பான அதிகாரங்களும் இருந்தன.கடந்த அரசாங்கத்தின் காலத்தில் தேசிய பாடசாலைகள் ஒரு சில பாடசாலைகள் மாற்றப்பட்டு இன்று அந்த தேசிய பாடசாலைகள் என்பது ஒரு பெயர் பலகையுடன் மட்டும் மட்டுப்படுத்தப்பட்டுள்ளது.
கல்வி அபிவிருத்தி செயற்பாடுகள் எங்களின் கைகளில் வழங்கப்படவேண்டும்.தெற்குக்கு அமுல்படுத்தும் திட்டங்கள் அனைத்தும் வடகிழக்குக்கு பொருத்தமாக அமையாது.வடகிழக்கில் உள்ள மக்களின் பிரச்சினை ஏனைய பகுதிகளில் மக்களின் பிரச்சினைகளில் வேறுபட்டதை அரசாங்கம் உணரவேண்டும்.
தற்போது ஜனாதிபதி அவர்கள் உள்ளுராட்சிமன்ற தேர்தலை பிற்போடுவதற்கான வேலைத்திட்டத்தினை உருவாக்கியுள்ளார்.அதுதான் வட்டாரங்களை மீளாய்வு செய்யும் நடவடிக்கை என்ற பெயரில் இந்த வேலைத்திட்டம் முன்னெடுக்கப்படுகின்றது.முறையான வகையில் மீளாய்வுசெய்யப்படாமல் இந்த வேலைத்திட்டங்கள் முன்னெடுக்கப்படுகின்றது.
தெற்கில் நான்கு ஐந்து வட்டாரங்களை வைத்துக்கொண்டு நகரசபையாக இயங்கும் இடங்களும் உண்டு.ஆனால் கிழக்கில் தமிழ் பகுதிகளில் கூடுதலான வட்டாரங்களைக்கொண்டு மாநகரசபைகளும் பிரதேசசபைகளும் இயங்குகின்றது.
சில பிரதேசசபைகளை இரண்டு பிரதேசசபைகளா மாற்றவேண்டும் என்ற கோரிக்கைகளை முன்வைத்துவரும் நிலையில் வட்டாரங்களை குறைத்து மேற்கொள்ளப்படும் சீரமைப்பு தமிழ் மக்களுக்கு பாரிய சிக்கலை ஏற்படுத்தும்.
வடகிழக்கில் உள்ள மக்களின் பிரச்சினையென்பது மாறுபட்டதாகும்.நாடு முழுவதும் பொதுவான தீர்மானங்கள் எடுக்கும்போது தமிழ் மக்கள் அதனால் பாதிக்கப்படுகின்றார்கள்.
தமிழ் தேசிய மக்கள் முன்னணியை பொறுத்த வரையில் அவர்களின் அரசியல் நிலைப்பாடு என்ன என்பது குறித்தும் கூட தெரியாதவர்களாகவே அக்கட்சியினர் உள்ளனர்.அவர்களின் அரசியல் நிலைப்பாடு என்ன என்பது குறித்தும் அறிவதற்கு ஆவலாகயிருக்கின்றோம்.அவர்களின் ஒரேயொரு நோக்கம் தமிழ் தேசிய கூட்டமைப்பினை அரசியலிலிருந்து ஒதுக்கிவிட்டு அதன் பின்னர் தங்களது அரசியல் நிலைப்பாடை அறிவிக்கும் வகையிலேயே அவர்களது திட்டம் உள்ளது.
ஒரு நாட்டின் ஜனாதிபதியுடன் பேசாமல் அமெரிக்க ஜனாதிபதி அவர்களை அழைத்துப்பேசுவார் என்ற நினைப்பில் தமிழ் தேசிய மக்கள் முன்னணியினர் உள்ளனரோ தெரியாது.இவர்களின் நிலைப்பாடுகள் தொடர்பில் பல்வேறு சந்தேகங்கள் காணப்படுகின்றன.
சரத் வீரசேகர போன்ற இனவாத நாடாளுமன்ற உறுப்பினர்கள் சொல்கின்றார் மாகாணசபையினை இல்லாமல்செய்யவேண்டும் என்றுகூறுகின்றார்.இதேகொள்கையுடனேயே தமிழ் தேசிய மக்கள் முன்னணி நாடாளுமன்ற உறுப்பினர்களான கஜேந்திரகுமாரும் செல்வராஜா கஜேந்திரனும் உள்ளனர்.இதனை வலியுறுத்தி வடகிழக்கு எங்கும் சவப்பெட்டியை வைத்து ஊர்வலம் சென்றார்கள்.
அரசியல் தீர்வினை 13வது அரசியலமைப்புக்குள் முடக்குவதற்கு நாங்கள் ஒருபோதும் அனுமதிக்கமாட்டோம்.13வது திருத்த சட்டத்தில் உள்ள மாகாணசபை முறைமையினைக்கொண்டு அதனை நாங்கள் இன்னும் பலப்படுத்தவேண்டும்.மாகாணசபை முறைமையில் பிழைகள் உள்ளது.அதனை ஏற்றுக்கொள்கின்றோம்.ஆனால் இவர்கள் எதுவும் வேண்டாம் என்று கூறுகின்றார்கள்.” என தெரிவித்தார்
