உக்ரைனும் ரஷ்யாவும் கிழக்கு உக்ரைனிய நகரமான பாக்முட்டில், பெரும் இழப்புகளை சந்தித்துள்ளதாக அறிவித்துள்ளன.
கடந்த சில நாட்களில் ரஷ்யப் படைகள் 1,100க்கும் மேற்பட்ட உயிரிழப்புகளைச் சந்தித்துள்ளதாகவும் பலர் படுகாயமடைந்துள்ளதாகவும் உக்ரைன் ஜனாதிபதி வோலோடிமிர் ஸெலென்ஸ்கி தெரிவித்துள்ளார்.
அதேவேளை, கடந்த 24 மணி நேரத்தில் 220க்கும் மேற்பட்ட உக்ரைன் சேவை உறுப்பினர்களை கொன்றுள்ளதாக ரஷ்யா தெரிவித்துள்ளது.
பாக்முட்டில் போர் தீவிரமடைந்து வருவதால் இழப்புகள் தொடர்பான சரியான எண்ணிக்கையை பெற்றுக்கொள்ள முடியவில்லை என கூறப்படுகின்றது.
ரஷ்யா மற்றும் அதன் பிரிவினைவாத கூட்டாளிகளின் கட்டுப்பாட்டின் கீழ் உள்ள உக்ரைனின் டொனெட்ஸ்க் பகுதியில் உள்ள பாக்முட்டில், ஒரு வருடத்திற்கு முன்பு ரஷ்யா உக்ரைனை ஆக்கிரமித்ததில் இருந்து அங்கு சில கடுமையான சண்டைகள் நடந்துள்ளன.
கடந்த இலையுதிர்காலத்தில் ரஷ்யா சட்டவிரோதமாக இணைக்கப்பட்ட நான்கு மாகாணங்களில் ஒன்றான டொனெட்ஸ்க் மாகாணத்தில் பக்முட் அமைந்துள்ளது. ரஷ்யா டொனெட்ஸ்க் மாகாணத்தின் பாதியைக் கட்டுப்படுத்துகிறது. அந்த மாகாணத்தின் மீதமுள்ள பாதியைக் கைப்பற்ற, ரஷ்யப் படைகள் பாக்முட் வழியாகச் செல்ல வேண்டும்.
இதுவரை பாக்முட் நகரம் உக்ரைன் படையினரின் கட்டுப்பாட்டில்தான் உள்ளது. ஆனால், தேவைப்படும்போது அந்த நகரிலிருந்து இராணுவம் வெளியேறும் என உக்ரைனிய ஜனாதிபதி வோலோடிமிர் ஸெலென்ஸ்கியின் பொருளாதார ஆலோசகரான அலெக்சாண்டர் ரோட்னியன்ஸ்கி முன்னதாக கூறியிருந்தார் என்பது குறிப்பிடத்தக்கது.
