ஆப்கானிஸ்தான் அணிக்கெதிரான மூன்றாவதும் இறுதியுமான ரி-20 போட்டியில், பாகிஸ்தான் அணி 66 ஓட்டங்கள் வித்தியாசத்தில் வெற்றிபெற்றது.
ஆனாலும் முதலிரண்டு போட்டிகளில் வெற்றிபெற்று ஆப்கானிஸ்தான் அணி, மூன்று போட்டிகள் கொண்ட ரி-20 தொடரை 2-1 என்ற கணக்கில் கைப்பற்றியது.
இந்த தொடரை வெற்றிக்கொண்டதன் மூலம் பாகிஸ்தான் அணிக்கெதிரான முதல் ரி-20 தொடரை ஆப்கானிஸ்தான் அணி கைப்பற்றியது.
சார்ஜாவில் நேற்று (திங்கட்கிழமை) நடைபெற்ற இப்போட்டியில், நாணய சுழற்சியில் வெற்றிபெற்ற ஆப்கானிஸ்தான் அணி, களத்தடுப்பை தீர்மானித்தது.
இதன்படி முதலில் துடுப்பெடுத்தாடிய பாகிஸ்தாhன் அணி, நிர்ணயிக்கப்பட்ட 20 ஓவர்கள் நிறைவில் 7 விக்கெட்டுகள் இழப்புக்கு 182 ஓட்டங்களை பெற்றுக்கொண்டது.
இதனைத்தொடர்ந்து பதிலுக்கு களமிறங்கிய ஆப்கானிஸ்தான் அணி, 18.4 ஓவர்கள் நிறைவில் 116 ஓட்டங்களுக்கு சுருண்டது. இதனால், பாகிஸ்தான் அணி 66 ஓட்டங்கள் வித்தியாசத்தில் வெற்றிபெற்றது.
இப்போட்டியின் ஆட்டநாயகனாக, சதாப் கான் தெரிவுசெய்யப்பட்டதோடு, தொடரின் நாயகனாக மொஹமட் நபி தெரிவுசெய்யப்பட்டார்.
