வடக்கு காஷ்மீரின் பந்திபோரா மாவட்டத்தைச் சேர்ந்த ராஜா சலீமின் கிரிக்கெட் பயணம், மனஉறுதி, விளையாட்டின் மீதான காதல் ஆகியவற்றுக்கான முன்னுதாரணம் மிக்க கதையாகும்.
இருப்பினும், அவரது விதி வேறுபட்ட திட்டங்களைக் கொண்டிருந்தது, முதுகில் ஏற்பட்ட காயம் சர்வதேச கிரிக்கெட்டில் விளையாடும் அவரது கனவை கைவிடும்படி கட்டாயப்படுத்தியது.
இந்த பின்னடைவை எண்ணி அவர் உடைந்துவிடவில்லை, மாறாக இளம் மற்றும் வளரும் கிரிக்கெட் வீரர்கள் தங்கள் கனவுகளை அடைய உதவுவதற்கு முடிவு செய்தார்.
அந்த இளைஞர்களுக்கு பயிற்சி அளிக்க அவர் ஒரு கிரிக்கெட் அகாடமியை ஆரம்பித்தார்.
இதனால், சலீம் இப்போது ஒரு பயிற்சியாளராக அறியப்படுகிறார், அவர் கிரிக்கெட் திறன்களை வழங்குவதோடு மட்டுமல்லாமல், விடாமுயற்சி, விளையாட்டுத்திறன் மற்றும் குழுப்பணி போன்ற மதிப்புகளை தனது மாணவர்களிடம் விதைக்கிறார்.
சலீமின் மிகப்பெரிய சவால்களில் ஒன்று பள்ளத்தாக்கில் நீண்ட மற்றும் கடுமையான குளிருடனான காலநிலையாகும்.
இது பெரும்பாலும் வளரும் கிரிக்கெட் வீரர்களை விளையாட்டிலிருந்து விலக்கிச் செல்வதற்கு காரணமாகின்றது.
இதனை உணர்ந்து கொண்ட அவர், மாற்றத்தை ஏற்படுத்துவதற்கு தனக்கு ஒரு வாய்ப்புக் கிட்டியதாக கருதுகின்றார்.
அவர் தனக்குச் சொந்தமான பாடசாலைக் கட்டிடத்திற்குள் உள்ளரங்க ஆடுகளத்தை உருவாக்குவதற்கான புதுமையான யோசனையைக் கொண்டு வந்தார்.
இந்த உள்ளக ஆடுகளம் இளம் வீரர்களை ஆண்டு முழுவதும் பயிற்சி செய்யவும், விளையாட்டுடன் பின்னிப்பிணைந்திருக்கவும் இருக்கவும் வழிசமைத்தது.மாவட்டத்தில் கிரிக்கெட்டின் எதிர்காலத்தை வடிவமைப்பதில் சலீமின் பங்கு பாராட்டுக்குரியது,
‘ஒரு கிரிக்கெட் வீரராக ஆவதற்கான எனது பயணம் 1996ஆம் ஆண்டு பந்திபோராவில் உள்ள விளையாட்டு மைதானத்தில் தொடங்கியது, அங்கு நான் முதலில் விளையாட்டின் மீது காதல் கொண்டேன்.
அங்கிருந்து, கிரிக்கெட் மீதான எனது ஆர்வம் என்னை டெல்லிக்கு அழைத்துச் சென்றது, அங்கு நான் எனது தேசிய வாழ்க்கையைத் தொடங்கினேன்,’ என்று அவர் கூறினார்.
‘நான் விளையாட்டில் சில சிறந்த வீரர்களுடன் விளையாடினேன், ரஞ்சி மற்றும் கவுண்டி கிரிக்கெட் லீக்கில் போட்டியிட்டேன், மேலும் ‘ஏ’ லீக்கில் ஐக்கிய அரபு எமிரேட்ஸை பிரதிநிதித்துவப்படுத்தினேன்’ என்றார்.
‘அவை என் வாழ்வில் மறக்க முடியாத மற்றும் சவாலான தருணங்கள், ஆனால் இன்று நான் இருக்கும் நபராகவும் பயிற்சியாளராகவும் என்னை வடிவமைக்க அவை உதவியுள்ளன’ என்று சலீம் தனது கடந்த காலத்தினை நினைவு கூர்ந்தார்.
