மும்பை இந்தியன்ஸ் அணிக்கும், சென்னை சுப்பர் கிங்ஸ் அணிக்கும் இடையே நேற்றைய தினம்( 14 ) இடம்பெற்ற போட்டியில் சென்னை அணி 20 ஓட்டங்களால் வெற்றியீட்டியது.
குறித்த போட்டியில் அபாரமாகப் பந்துவீசிய இலங்கை வீரர் மதீஷ பத்திரன 28 ஓட்டங்களுக்கு 4 விக்கெட்டுகளை வீழ்த்தி ஆட்டநாயகன் விருதை தனதாக்கிக் கொண்டார்.
இப் போட்டியில் முதலில் துடுப்பெடுத்தாடிய சென்னை அணி நிர்ணயிக்கப்பட்ட 20 ஓவர்கள் முடிவில் 4 விக்கெட் இழப்புக்கு 206 ஓட்டங்களை எடுத்தது. அணி சார்பில் சிவம் துபே 66 ஓட்டங்களையும், அணியின் தலைவர் ருத்ராஜ் 69 ஓட்டங்களையும் பெற்றனர். இறுதியாகக் களமிறங்கிய மகேந்திரசிங் தோனி 4 பந்துகளுக்கு முகம் கொடுத்து 3 சிக்ஸர்களை விளாசி 20 ஓட்டங்களை பெற்று ரசிகர்களை மிரளவைத்தார்.
பின்னர் பதிலுக்கு துடுப்பாடிய மும்பை இந்தியன்ஸ் அணி நிர்ணயிக்கப்பட்ட 20 ஓவர்கள் முடிவில் 6 விக்கெட் இழப்புக்கு 186 ஓட்டங்களை பெற்று தோல்வியடைந்தது. துடுப்பாட்டத்தில் மும்பை இந்தியன்ஸ் அணி சார்பில் ரோகித் சர்மா ஆட்டமிழக்காமல் 105 ஓட்டங்களை எடுத்திருந்தார் என்பதும் குறிப்பிடத்தக்கது.
