பயங்கரவாதத் தாக்குதல் அபாயம் உள்ளதால், தென்னிலங்கையில் உள்ள சில சுற்றுலாப் பகுதிகளை விட்டு உடனடியாக வெளியேறுமாறு இலங்கையில் உள்ள இஸ்ரேலியர்களுக்கு அந் நாட்டு தேசிய பாதுகாப்புச் சபை புதன்கிழமை (23) அழைப்பு விடுத்துள்ளது.
அறுகம்பை வளைகுடா பகுதி, இலங்கையின் தெற்கு மற்றும் மேற்கில் அமைந்துள்ள கடற்கரைகள் தொடர்பான இந்த எச்சரிக்கையானது, சுற்றுலாப் பகுதிகள், கடற்கரைகளை மையமாகக் கொண்ட பயங்கரவாத தாக்குதல் பற்றிய எச்சரிக்கையை அடிப்படையாகக் கொண்டவை என இஸ்ரேல் தேசிய பாதுகாப்புச் சபை கூறியுள்ளது.
மேலும், இலங்கையின் ஏனைய பகுதிகளில் உள்ள இஸ்ரேலியர்களை எச்சரிக்கையாக இருக்குமாறும், பொது இடங்களில் பெரிய கூட்டங்களை நடத்துவதை தவிர்க்குமாறும் இலங்கையில் உள்ள இஸ்ரேலியர்களுக்கு அது அழைப்பு விடுத்துள்ளது.
அத்துடன், இஸ்ரேலிய பாதுகாப்பு அமைப்பு, இலங்கையில் உள்ள பாதுகாப்பு அதிகாரிகளுடன் நெருங்கிய தொடர்பில் உள்ளதாகவும், தாக்குதல் எச்சரிக்கை தொடர்பில் தொடர்ந்தும் கண்காணித்து வருவதாகவும் கூறியுள்ளது.
