அரச உத்தியோகத்தர்களின் சம்பளத்தை அதிகரிப்பது தொடர்பில் தாம் எடுத்த சட்ட அமைச்சரவை தீர்மானத்தை உடனடியாக அமுல்படுத்த வேண்டும் என முன்னாள் ஜனாதிபதி ரணில் விக்ரமசிங்க தெரிவித்துள்ளார்.
கொழும்பு மால் வீதியிலுள்ள புதிய ஜனநாயக முன்னணியின் அலுவலகத்தில் நேற்று(23) நடைபெற்ற தொழிற்சங்க பிரதிநிதிகள் கூட்டத்தில் கலந்துகொண்டு கருத்துத் தெரிவித்த போதே அவர் இதனைக் குறிப்பிட்டுள்ளார்.
இது குறித்து அவர் மேலும் தெரிவித்துள்ளதாவது”சம்பள உயர்வுக்கான கோரிக்கை நியாயமானது. 2022 ஆம் ஆண்டு மக்களின் ஊதியத்தின் மதிப்பு 50% குறைவடைந்த போது அவர்கள் கஷ்டப்பட்டு வாழ்ந்தார்கள்.
நான் ஆட்சிப் பொறுப்பேற்ற ஆரம்ப காலத்தில் சிலருக்குக் கடன் கொடுக்க வேண்டிய நிலை ஏற்பட்டது. அதை நாட்டுக்கு அறிவித்தேன். சிலர் சம்பளத்தை இருபதாயிரம் உயர்த்தச் சொன்னார்கள்.
மேலும் இந்த சம்பள உயர்வை வழங்கும்போது நான் கருத்தில் கொண்ட இன்னொரு விடயமும் உள்ளது. அதாவது அடுத்த ஆண்டுக்குள் நமது அரச வருமானம் பன்னிரெண்டு சதவீதத்தில் இருந்து 13 சதவீதமாக அதிகரிக்க வேண்டும். பணம் இல்லை என்று சொன்னால் அது விசித்திரமான கதை. திசைகாட்டி கொடுத்த வாக்குறுதிகளை நிறைவேற்ற முடியாவிட்டால் நாங்கள் கொடுத்த வாக்குறுதிகளை நிறைவேற்றுங்கள்.
அரச உத்தியோகத்தர்களுக்கான இந்த சம்பள அதிகரிப்பு ஜனவரி மாதம் முதல் நடைமுறைப்படுத்தப்பட வேண்டும் என்பது எனது யோசனையாக இருந்தது. நான் ஜனாதிபதி தேர்தலில் வெற்றி பெற்றால் இந்த சம்பள அதிகரிப்பை டிசம்பரில் அல்லது ஜனவரி மாதம் முதல் இரண்டு வாரங்களில் நிறைவேற்றி ஜனவரி மாத இறுதியில் சம்பளத்தை வழங்கியிருப்பேன். எனவே இந்த சம்பள உயர்வை வழங்குவதை தாமதப்படுத்த முயற்சிக்காதீர்கள்” இவ்வாறு ரணில் விக்ரமசிங்க தெரிவித்துள்ளார்.
