பிரித்தானியாவின் வேல்ஸ் பகுதியில் உள்ள பழமையான தேவாலயம் (Chapel) ஒன்று வெறும் 7,000 பவுண்டுகளுக்கு ஏலத்திற்கு வந்துள்ளது.
பிரித்தானியாவின் சராசரி வீட்டின் விலையை விட சுமார் 43 மடங்கு குறைந்த விலையில், வரலாற்றுச் சிறப்புமிக்க தேவாலயம் ஒன்று ஏலத்திற்கு விடப்பட்டுள்ளது.
வேல்ஸின் நியூ ட்ரெடேகர் (New Tredegar) பகுதியில் அமைந்துள்ள ‘பெத்தேல் சாப்பல்’ (Bethel Chapel) எனும் இந்தத் தேவாலயத்தின் ஆரம்ப ஏல விலை வெறும் 7,000 பவுண்டுகளாக நிர்ணயிக்கப்பட்டுள்ளது.
இது 1860-ஆம் ஆண்டு கட்டப்பட்ட, உட்புறத்தில் பிரசங்க மேடை (Pulpit), மரத்தாலான இருக்கைகள் (Pews) மற்றும் முதல் தளத்தில் வழிபாட்டாளர்கள் அமரக்கூடிய அழகிய மரத்தாலான கேலரி வசதி ஆகியவற்றை இன்றும் அப்படியே கொண்டுள்ளது.
இதேவேளை, முறையான திட்டமிடல் அனுமதியைப் பெற்று, இதனை ஒரு சொகுசு வீடாகவோ அல்லது சமூகக் கூடமாகவோ மாற்றியமைக்க முடியும் என ஏல நிறுவனம் தெரிவித்துள்ளது.
வேல்ஸில் தற்போது வழிபாட்டுத் தலங்களின் எண்ணிக்கை குறைந்து வருவதால், பல தேவாலயங்கள் மூடப்பட்டும் இடிக்கப்பட்டும் வருகின்றன இதனால் இந்த தேவலயத்தை விற்பனை செய்ய நடவடிக்கை எடுக்கப்பட்டுள்ளது.
வேல்ஸில் நிலவும் வீட்டு வசதித் தட்டுப்பாட்டிற்குத் தீர்வாக, இத்தகைய பயன்பாட்டில் இல்லாத வழிபாட்டுத் தலங்கள் மற்றும் அவற்றுக்குச் சொந்தமான நிலங்களைப் பயன்படுத்தினால், சுமார் 6,800 மலிவு விலை வீடுகளை உருவாக்க முடியும் என ஆய்வறிக்கை ஒன்று தெரிவிக்கிறது.
இந்த மாத இறுதியில் நடைபெறவுள்ள ‘பால் ஃபோஷ்’ (Paul Fosh) ஏலத்தில், இந்தத் தேவாலயத்தைக் கைப்பற்றப் பலரும் ஆர்வம் காட்டி வருகின்றனர். இருப்பினும், இதனை வீடாக மாற்றக் கூடுதல் செலவும், சட்ட ரீதியான அனுமதிகளும் தேவைப்படும் என்பது குறிப்பிடத்தக்கது.
