சம்மாந்துறை, மாவடிப்பள்ளி பகுதியில் மாணவர்களை ஏற்றிச் சென்ற டிராக்டர் வாகனம் வெள்ளம் காரணமாக கவிழ்ந்து விபத்துக்குள்ளானதில் காணாமல் போனவர்களில் மற்றுமொருவருவர் உயிரிழந்த நிலையில் இன்று (28) காலை சடலமாக மீட்கப்பட்டுள்ளார்.
இவ்வாறு சடலமாக மீட்கப்பட்டவர் குறித்த டிராக்டர் வாகனத்தின் சாரதிக்கு உதவியாக பயணித்த நபர் என்றும், அவர் வாகன புகைப் பரிசோதனை மேற்கொள்ளும் அதிகாரி என்றும் அடையாளம் காணப்பட்டுள்ளார்.
அவரது சடலம் பிரேத பரிசோதனைக்காக சம்மாந்துறை ஆதார வைத்தியசாலைக்கு கொண்டு செல்லப்பட்டுள்ளதாக சம்மாந்துறை பொலிஸார் தெரிவித்துள்ளனர்.
இதேவேளை நேற்று (27) மாலை வரை காணாமல் போன மாணவர்களில் நால்வர் உயிரிழந்த நிலையில் சடலங்களாக மீட்கப்பட்டிருந்தனர்.
அவர்களின் சடலங்கள் தொடர்பான பிரேதப் பரிசோதனைகள் சம்மாந்துறை ஆதார வைத்தியசாலையில் மேற்கொள்ளப்பட்டதன் பின்னர், உறவினர்களிடம் ஒப்படைக்கப்பட்டிருந்தது.
இந்த நிலையில் காணாமல் போன ஏனைய இரு மாணவர்களையும் தேடும் முயற்சிகளானது தொடர்ச்சியாக முன்னெடுக்கப்பட்டு வருகின்றன.
பின்னணி
நேற்றுமுன்னம் (26) மாலை காரைத்தீவு பொலிஸ் பிரிவுக்குட்பட்ட நிந்தவூர் பகுதியில் அமைந்துள்ள மத்ரஷா ஒன்றிலிருந்து சம்மாந்துறைக்கு மாணவர்களை ஏற்றிச் சென்ற டிராக்டரானது வெள்ளத்தால் மாவடிப்பள்ளி பாலத்திற்கு அருகே கவிழ்ந்து விபத்துக்குள்ளானது.
இதன்போது, டிராக்டர் வாகனத்தின் சாரதியும் அவரது உதவியாளரும் மற்றும் 11 மாணவர்களும் பயணித்துள்ளனர்.
அவர்களில் 05 மாணவர்கள் பாதுகாப்பாக மீட்கப்பட்டிருந்தனர்.
அதேநேரம், வெள்ளத்தில் அடித்துச் செல்லப்பட்ட நிலையில் காணாமல் போன ஏனையவர்களை தேடும் முயற்சிகளானது இலங்கை கடற்படையின் உதவியுடன் மேற்கொள்ளப்பட்டு வருகின்றது.
முன்னதாக டிராக்டர் வாகனத்தின் சாரதி காணாமல் போனதாக கூறப்பட்டிருந்தார், எனினும் அவர் தற்சமயம் உயிருடன் உள்ளதாக சம்மாந்துறை பொலிஸார் உறுதிபடுத்தியுள்ளனர்.
சம்பவத்தில் பாதிக்கப்பட்ட சிறுவர்கள் 12 – 16 வயதுக்கு இடைப்பட்ட சம்மாந்துறை பகுதியைச் சேர்ந்தவர்கள் என அடையாளம் காணப்பட்டுள்ளனர்.
