ஜனாதிபதி டொனால்ட் ட்ரம்ப், பதவியேற்பின் பின் திங்களன்று (27) இந்திய பிரதமர் நரேந்திர மோடியுடனான தனது முதல் தொலைபேசி அழைப்பின் போது இந்தியாவும் அமெரிக்காவும் “நியாயமான” வர்த்தக உறவை வளர்த்துக் கொள்ள அழைப்பு விடுத்தார்.
உலகின் முதல் இரண்டு பெரிய ஜனநாயக நாடுகளின் தலைவர்களுக்கிடையேயான இந்த உரையாடிலின் போது, இரு தரப்பினரிடையேயான ஒத்துழைப்பை விரிவுபடுத்துதல், ஆழப்படுத்துதல் மற்றும் இந்தோ-பசுபிக், ஐரோப்பா, மத்திய கிழக்கு நாடுகளில் பாதுகாப்பு உட்பட பல பிராந்திய பிரச்சினைகள் குறித்து விவாதிக்கப்பட்டதாகவும் வெள்ளை மாளிகை கூறியது.
அமெரிக்காவில் தயாரிக்கப்பட்ட பாதுகாப்பு உபகரணங்களை இந்தியா வாங்குவதை அதிகரித்து, நியாயமான இருதரப்பு வர்த்தக உறவை நோக்கி நகர்வதன் முக்கியத்துவத்தை ஜனாதிபதி ட்ரம்ப் இதன்போது வலியுறுத்தினார்.
நட்பின் வலிமையை அடிக்கோடிட்டுக் காட்டும் வகையில், பிரதமர் மோடி வெள்ளை மாளிகைக்கு வருகை தரும் திட்டங்கள் தொடர்பிலும் இரு தலைவர்களும் விவாதித்ததாக கூறப்பட்டுள்ளது.
இந்த சந்திப்பு குறித்து பின்னர் ஊடகவியலாளர்களிடம் பேசிய ட்ரம்ப், அவர்கள் குடியேற்றம் குறித்தும் பேசியதாகவும், எதிர்வரும் பெப்ரவரியில் மோடி அமெரிக்கா வருவார் என்றும் கூறினார்.
நான் இன்று (திங்கட்கிழமை) காலை அவருடன் நீண்ட நேரம் பேசினேன். அவர் அடுத்த மாதம், அநேகமாக பெப்ரவரியில் வெள்ளை மாளிகைக்கு வருவார் என எதிர்பார்க்கிறேன். இந்தியாவுடன் எங்களுக்கு நல்ல உறவு உள்ளது,
சட்டவிரோதமாக அமெரிக்காவிற்கு வந்த இந்திய குடியேற்றவாசிகளை திரும்ப அழைத்து வரும் விவகாரத்தில், பிரதமர் நரேந்திர மோடி உரிய நடவடிக்கைகளை மேற்கொள்வார் என்றும் ட்ரம்ப் இதன்போது சுட்டிக்காட்டினார்.
இந்த அறிவிப்புக்கு முன்னதாக இந்தியப் பிரதமர் மோடி, டரம்புடன் தெலைபேசியில் பேசியதை உறுதிப்படுத்தியிருந்தார்.
இது குறித்து எக்ஸில் பதிவிட்ட அவர்,
உரையாடலில், அவரது வரலாற்று சிறப்புமிக்க இரண்டாவது பதவிக்காலத்திற்கு” அமெரிக்க ஜனாதிபதிக்கு வாழ்த்து தெரிவித்ததாக கூறினார்.
“பரஸ்பர நன்மை மற்றும் நம்பகமான கூட்டாண்மைக்கு நாங்கள் கடமைப்பட்டுள்ளோம், எங்கள் மக்களின் நலனுக்காகவும், உலகளாவிய அமைதி, செழிப்பு மற்றும் பாதுகாப்பிற்காகவும் நாங்கள் ஒன்றாக செயற்படுவோம்” என்று தொலைபேசி உரையாடலின் போது ட்ரம்பிடம் கூறியதாகவும் மோடி குறிப்பிட்டிருந்தார்.
