தலைமுடி உதிர்தல், முடி கொட்டுதல் பிரச்சினை உலகம் முழுவதுக்கும் உள்ள பிரச்சினையாகும். பொதுவாக, எல்லோருக்குமே தினமும் கொஞ்சம் முடிகள் தலையிலிருந்து கொட்டத்தான் செய்யும். இதை நாம் கவனிக்க மாட்டோம். கண்டுகொள்ளவும் மாட்டோம். சிலருக்கு தலை வாரும்போதெல்லாம் நிறைய முடி கொட்டும். இதனால் ஒரு கட்டத்தில் ஒட்டுமொத்த முடியையும் இழக்க நேரிடுமோ என்ற கவலை உருவாகும்.
குறைவாக முடி கொட்டும்போது, கொட்டும் முடியைவிட சற்று அதிகமாகவே புதிய முடிகளும் வளர ஆரம்பிக்கும். அதனால் வெளியில் தெரியாது. ஆனால், முடி கொட்டிய இடத்தில் புது முடிகள் முளைக்காதபோதுதான் தலைமுடி இழப்பு, தலையில் முடி கொட்டுதல் போன்றவை தெரிய ஆரம்பிக்கும்.
முடி இழப்பு மற்றும் முடி கொட்டுவதற்கு பல காரணங்கள் இருக்கின்றன.
1). மரபுவழி அதாவது பரம்பரைக் காரணங்கள் மிக முக்கியமானதாகும். வயது கூடிக்கொண்டே வரும்போது ஆண்களுக்கு தலையின் முன்பக்கத்திலிருந்து பின்பக்கத்தை நோக்கி தலைமுடி கொட்டிக் கொண்டே போவது, பெண்களுக்கு தலை உச்சியில் முடி கொட்ட ஆரம்பிப்பது, இந்த அமைப்பில்தான் ஆண், பெண் இருவருக்கும் பரம்பரையாக முடி கொட்டும்.
2). பெண்களைப் பொறுத்தவரை கர்ப்பகாலம், பிரசவகாலம், மாதவிடாய் நிரந்தமாக நிற்கின்ற காலம், தைராய்டு பிரச்சினை உள்ளவர்கள், இரும்புச்சத்து குறைபாடு உள்ளவர்கள் இவர்களுக்கெல்லாம் தலைமுடி தற்காலிகமாகவோ, அல்லது நிரந்தரமாகவோ கொட்டலாம்.
3). தலையில் ஏற்படும் தோல் நோய்கள், நோய் எதிர்ப்பு சக்தி குறையும் சமயம், இன்னும் சில காரணங்களினாலும் தலைமுடி கொட்டலாம்.
4). புற்றுநோய்க்கு கதிர்வீச்சு சிகிச்சை எடுத்துக் கொள்பவர்களுக்கு தலைமுடி முழுவதும் கொட்டிவிடும். நோய் முழுவதும் குணமானபின் மறுபடியும் தலை முழுவதும் முடி வளர்ந்துவிடுவதுண்டு.
5). உடலாலும், மனதாலும் ஏற்படும் ஒரு மிகப்பெரிய அதிர்ச்சியான சம்பவத்திற்குப் பின்னர், தலைமுடி கொட்டுவதுண்டு. பிரச்சினை சரியான பின் முடி மீண்டும் வளர ஆரம்பித்துவிடும்.
6). அதிக ஹேர் ஸ்டைல் பண்ணுபவர்களுக்கும், தலைமுடி கொட்டுவதைத் தடுக்க எண்ணெய், க்ரீம், பேஸ்ட், போன்ற ரசாயனப் பொருட்கள் கலவையை அடிக்கடி, அதிகமாக உபயோகிப்பவர்களுக்கும் முடி கொட்டும்.
7). அப்பா, அம்மாவுக்கு தலை வழுக்கை, தலைமுடி அதிகமாக கொட்டுதல் இருந்தால், பிள்ளைகளுக்கும் அதே ஸ்டைலில் கொட்டும்.
8). வயது கூடக்கூட முடி கொட்டுவது இயற்கையாகவே நடக்கத்தான் செய்யும்.
9). திடீரென்று உடல் எடை குறைந்தால் தலைமுடி கொட்ட வாய்ப்புண்டு.
10). சர்க்கரை நோய், லூப்பஸ் நோய் உள்ளவர்களுக்கு தலைமுடி அதிகமாக கொட்டும்.
11). அதிக மன அழுத்தம், தலைமுடியை அதிகமாக பிய்த்துக் கொள்வது, டென்ஷன் போன்றவையும் தலைமுடியைக் கொட்டச் செய்யும்.
12). போதுமான, தேவையான சரிவிகித சத்துணவு உடலுக்குக் கிடைக்காவிட்டாலும் தலைமுடி கொட்டும்.
13). ஹேர் டை, ஹேர் ஷாம்பு, ஹேர் க்ரீம் இன்னும் தலைமுடியைப் பாதுகாக்க என்னென்ன ரசாயனம் கலந்த பொருட்களை உபயோகிக்கிறீர்களோ, அவை எல்லாமே பாதிப்பை ஏற்படுத்தத்தான் செய்யும்.
ஆண்களைப் பொறுத்தவரை தலைமுடி இழப்பால், மிகப் பெரிய பிரச்சினைகள் ஒன்றும் குடும்பத்திலோ, சமுதாயத்திலோ வராது. ஆனால், பெண்களைப் பொறுத்தவரை ஒவ்வொரு தலைமுடி இழப்பும் குடும்பத்திலும் சரி, சமுதாயத்திலும் சரி மிகப்பெரிய பிரச்சினைதான்.
தீர்வுகள்
தலைமுடியை மிகவும் லாவகமாகக் கையாள வேண்டும். தலைமுடியிடம் கோபத்தை எப்பொழுதும் காட்டக் கூடாது. பெரிய பல் உள்ள சீப்புகளை உபயோகிக்க வேண்டும். தலைமுடியைப் பிய்த்துக் கொண்டு வரும் ரப்பர் , பிளாஸ்டிக் கிளிப்புகைள தவிர்க்க வேண்டும்.
தலைமுடி அதிகமாக கொட்ட ஆரம்பித்தால் டாக்டரிடம் ஆலோசனை பெறவேண்டும். தலைமுடி இழப்பை சரிகட்ட என்னென்ன வைட்டமின்கள், சத்துணவுகள், பழங்கள் சாப்பிடலாம் என்பதைக் கேட்டறிந்து அவற்றை அதிகமாகப் பயன்படுத்தலாம்.
அதிக சூரிய ஒளி நேரடியாக தலையில் படுமாறு இருப்பதைத் தவிர்க்கவேண்டும். சிகரெட் புகைப்பவர்கள் அந்த பழக்கத்தை நிறுத்துவது பலன் அளிக்கும். புற்றுநோய்க்கு மருந்து எடுத்துக் கொள்பவர்கள், டாக்டரிடம் கூலிங் தொப்பி போட்டுக் கொள்ளலாமா என்று கேட்டபின் அதை உபயோகிக்கவேண்டும்.
“தினமும் தலையில் எண்ணெய் தேய்க்க வேண்டும். தலைமுடி காய்ந்து போய் இருக்கக் கூடாது” என்று வீட்டில் உள்ள பெரியவர்கள் கண்டிப்பதுண்டு. இந்த அறிவுரைகளை புறந்தள்ளக்கூடாது.
