இந்தியப் பிரதமர் நரேந்திர மோடி ஏப்ரல் 4 முதல் 6 வரையிலான மூன்று நாள் இலங்கைப் பயணத்தின் இறுதி நாளான இன்று (06) அனுராதபுரத்திற்கு விஜயம் மேற்கொள்ளவுள்ளார்.
இந்தப் பயணத்தின் போது பிரதமர் மோடி, இலங்கை ஜனாதிபதி அனுர குமார திஸநாயக்கவுடன் இணைந்து, அநுராதபுரம் ஸ்ரீ மகா போதிக்கு சென்று வழிபாட்டில் ஈடுபடுவார் என ஜனாதிபதி ஊடகப் பிரிவு தெரிவித்துள்ளது.
அதைத் தொடர்ந்து, இந்திய அரசாங்கத்தால் ஆதரிக்கப்படும் ஒரு திட்டமான அனுராதபுரம் ரயில் நிலையத்தில் புதிய ரயில் சமிக்ஞை அமைப்பையும், புதிதாக மேம்படுத்தப்பட்ட மஹோ-ஓமந்தை ரயில் பாதையையும் அவர் திறந்து வைக்கவுள்ளார்.
இருதரப்பு உறவுகளை வலுப்படுத்துவதில் கவனம் செலுத்தும் இலங்கைக்கான அவரது மூன்று நாள் அரசு முறைப் பயணத்தின் ஒரு முக்கிய பகுதியாக இது அமைகிறது.
இதனிடையே, அனுராதபுரத்துக்கான பயணத்தை முன்னிட்டு, அனுராதபுரம் நகரம், ரயில் நிலைய வீதிகள் மற்றும் ஸ்ரீ மகா போதிக்கு அருகேயான வீதிகள் காலை 7:30 மணி முதல் காலை 10:30 மணி வரை அவ்வப்போது மூடப்படும் என்றும் அறிவிக்கப்பட்டுள்ளது.
முன்னதாக, பிரதமர் மோடி இலங்கை ஜனாதிபதி அனுர குமார திசாநாயக்கவுடன் ஆக்கப்பூர்வமான பேச்சுவார்த்தைகளை நடத்தினார், அங்கு இரு தலைவர்களும் பாதுகாப்பு, எரிசக்தி மற்றும் பொருளாதார மேம்பாடு உள்ளிட்ட பல்வேறு துறைகளில் ஒத்துழைப்பை மேம்படுத்துவது குறித்து விவாதித்தனர்.
பாதுகாப்பு ஒத்துழைப்புக்கான புரிந்துணர்வு ஒப்பந்தம் மற்றும் திருகோணமலையை எரிசக்தி மையமாக மேம்படுத்துவதற்காக இந்தியா, இலங்கை மற்றும் ஐக்கிய அரபு எமிரேட்ஸ் இடையே முத்தரப்பு புரிந்துணர்வு ஒப்பந்தம் உள்ளிட்ட குறிப்பிடத்தக்க ஒப்பந்தங்கள் கையெழுத்திடப்பட்டன.
இரு நாடுகளுக்கு இடையிலான உறவை வலுப்படுத்துதல், மீனவர்கள் தொடர்பான பிரச்சினைகளைத் தீர்ப்பது மற்றும் பொருளாதார மற்றும் மேம்பாட்டு ஒத்துழைப்பை மேம்படுத்துவது குறித்தும் கலந்துரையாடப்பட்டுள்ளன.
2024 செப்டம்பரில் ஜனாதிபதி அனுரகுமார திநாயக்க பதவியேற்ற பின்னர் இலங்கைக்கு வருகை தரும் முதல் வெளிநாட்டுத் தலைவர் என்ற பெருமையை இந்த விஜயம் மூலம் இந்தியப் பிரதமர் மோடி பெற்றுள்ளார்.
இலங்கையின் பொருளாதார மீட்சியை ஆதரிப்பதற்கும் இருதரப்பு உறவுகளை மேலும் ஆழப்படுத்துவதற்கும் இந்தியாவின் தொடர்ச்சியான உறுதிப்பாட்டை இந்த வருகை அடிக்கோடிட்டுக் காட்டுகிறது.
