பிரபல ‘கிராண்ட் நேஷனல்’ குதிரைப் பந்தயப் பயிற்சியாளர் ஒருவர், முதியவர் ஒருவரை ஹொக்கி மட்டையால் தாக்கியதாகத் தொடரப்பட்ட வழக்கு கார்டிஃப் நீதிமன்றத்தில் விசாரணைக்கு எடுத்துக்கொள்ளப்பட்டது.
வேல்ஸின் கிளாமோர்கன் (Vale of Glamorgan) பகுதியைச் சேர்ந்த 54 வயதான இவான் வில்லியம்ஸ் (Evan Williams), பிரபல குதிரைப் பந்தயப் பயிற்சியாளர் ஆவார்.
கடந்த 2024 டிசம்பர் 4-ஆம் திகதி இரவு , தனது நிலத்திற்குள் அத்துமீறி நுழைந்து வேட்டையாடுபவர் (Poacher) எனத் தவறாகக் கருதி, 72 வயதான மார்ட்டின் டான்ட்ரிட்ஜ் (Martin Dandridge) என்ற முதியவரை ஹாக்கி மட்டையால் கொடூரமாகத் தாக்கியதாக அவர் மீது குற்றம் சுமத்தப்பட்டுள்ளது.
சம்பவத்தன்று இரவு 9:30 மணியளவில், மார்ட்டின் டான்ட்ரிட்ஜ் தனது மகளின் நாயுடன் நடைப்பயிற்சி சென்றுள்ளார்.
இருள் வேளை என்பதால் அவர் தலையில் ஒரு விளக்கை (Head torch) அணிந்திருந்தார்.
இதனைப் பார்த்த இவான் வில்லியம்ஸ், யாரோ தனது நிலத்தில் வேட்டையாட முயல்வதாகக் கருதி, அங்கிருந்த பொலிஸாரிடம் “எனது நிலத்தில் வேட்டையாடுகிறார்கள், அவர்களை நான் மறிக்கப் போகிறேன்” என்று கூறிவிட்டு தனது வாகனத்தில் சென்றுள்ளார்.
அங்கு சென்ற வில்லியம்ஸ், முதியவரை நோக்கி ஆத்திரத்துடன் கத்தி, கையில் வைத்திருந்த ஹாக்கி மட்டையால் சரமாரியாகத் தாக்கியுள்ளார்.
நெஞ்சு, கால், கை மற்றும் முகம் எனப் பல இடங்களில் பலத்த காயங்களுக்குள்ளான அவர் தான் அருகில் உள்ள விடுதியில் தங்கியிருப்பதாக முதியவர் எவ்வளவோ கெஞ்சியும் வில்லியம்ஸ் தாக்குதலை நிறுத்தவில்லை என தெரிவித்தார்.
இதேவேளை, இந்தத் தாக்குதலில் அவரது கையில் இருந்த இரண்டு எலும்புகள் முறிந்திருப்பது எக்ஸ்-ரே பரிசோதனையில் உறுதியானது.
ஆனால், தன் மீதான குற்றச்சாட்டுகளை இவான் வில்லியம்ஸ் மறுத்துள்ளார்.
தான் ஹாக்கி மட்டை வைத்திருக்கவில்லை என்றும், குதிரைகளுக்குப் பயன்படுத்தும் கயிறையே வைத்திருந்ததாகவும் அவர் கூறியுள்ளார்.
முதியவர் தனது நாயால் இழுக்கப்பட்டு 3 அடி ஆழமுள்ள வடிகால் பள்ளத்தில் விழுந்ததால் தான் அவருக்கு எலும்பு முறிவு ஏற்பட்டதாக அவர் தரப்பில் வாதிடப்பட்டது.
இருப்பினும், அவர் திட்டமிட்டே முதியவரைத் தாக்கியதாக அரசு தரப்பு உறுதியாகத் தெரிவித்துள்ள நிலையில் இந்த வழக்கு தொடர்பான விசாரணை நீதிமன்றத்தில் எடுத்துக்கொள்ளப்பட்டுள்ளது.
