ஸ்ரீலங்கன் எயார்லைன்ஸ் நிறுவனத்தின் முன்னாள் பிரதம நிறைவேற்று அதிகாரி கபில சந்திரசேனவின் திடீர் மரணம் குறித்த விசாரணைகள் முடுக்கிவிடப்பட்டுள்ளன.
ஸ்ரீலங்கன் எயார்லைன்ஸ் நிறுவனத்தின் முன்னாள் பிரதம நிறைவேற்று அதிகாரி (CEO) கபில சந்திரசேனவின் மர்ம மரணம் தொடர்பான விசாரணைகளை, கொழும்பு குற்றத்தடுப்பு பிரிவு (CCD) பொறுப்பேற்றுள்ளது.
கொள்ளுப்பிட்டி பகுதியில் உள்ள அவரது வீட்டிலிருந்து நேற்று காலை கபில சந்திரசேனவின் சடலம் மீட்கப்பட்டது. அவர் தூக்கிட்டுத் தற்கொலை செய்திருக்கலாம் என ஆரம்பகட்ட விசாரணைகளில் சந்தேகிக்கப்படுகிறது. எனினும், அவர் நீதிமன்றத்தில் முன்னிலையாகவிருந்த தினத்தில் இந்த உயிரிழப்பு நிகழ்ந்துள்ளதால், இது குறித்த மேலதிக விசாரணைகளை கொழும்பு குற்றத்தடுப்பு பிரிவினர் தீவிரப்படுத்தியுள்ளனர்.
கோட்டை நீதவான் பசன் அமரசேனவின் உத்தரவின் பேரில், கொழும்பு பிரதான விசேட சட்ட வைத்திய அதிகாரி ஸ்ரீயந்த அமரரத்ன தலைமையில் ஐந்து பேர் கொண்ட விசேட சட்ட வைத்தியக் குழு நியமிக்கப்பட்டுள்ளது. இக்குழுவினர் இன்று காலை கொழும்பு சட்ட வைத்திய மற்றும் நச்சுயியல் நிறுவனத்தில் பிரேத பரிசோதனைகளை ஆரம்பித்துள்ளனர்.
கபில சந்திரசேனவின் மரணம் பல்வேறு கேள்விகளை எழுப்பியுள்ளது:
2013-ஆம் ஆண்டு எயார்பஸ் (Airbus) கொடுக்கல் வாங்கலில் 2 மில்லியன் அமெரிக்க டொலர்களை இலஞ்சமாகப் பெற்றதாக அவர் மீது வழக்கு நிலுவையில் உள்ளது.
கடந்த மே 5-ஆம் திகதி பிணையில் விடுவிக்கப்பட்ட அவர், தனது உறவினர்கள் எனக் கூறி இருவரைப் போலியாக நீதிமன்றத்தில் முன்னிலைப்படுத்தியமை தெரியவந்தது.
நீதிமன்றத்தை ஏமாற்றியமைக்காக அவரை மீண்டும் விளக்கமறியலில் வைக்க இலஞ்ச ஊழல் விசாரணை ஆணைக்குழு கோரியதையடுத்து, அவருக்கு மீண்டும் பிடியாணை பிறப்பிக்கப்பட்டது.
நேற்று (மே 8) நீதிமன்றத்தில் சரணடைய வேண்டியிருந்த நிலையில், அதற்குச் சில மணி நேரங்களுக்கு முன்னதாக அவர் சடலமாக மீட்கப்பட்டுள்ளமை குறிப்பிடத்தக்கது.
பிரேத பரிசோதனை அறிக்கை மற்றும் கொழும்பு குற்றத்தடுப்பு பிரிவின் விசாரணைகளின் பின்னர் இந்த மரணத்தின் பின்னணி தெரியவரும் என எதிர்பார்க்கப்படுகிறது.
