பிரித்தானியப் பிரதமர் கீர் ஸ்டார்மர் தனது தலைமைத்துவத்திற்கு எதிராக எழுந்துள்ள கடும் சவால்களுக்கு மத்தியிலும், நாட்டின் அடுத்த ஓராண்டிற்கான திட்டங்களை முன்வைக்கும் ‘அரசரின் உரை’ (King’s Speech) நிகழ்விற்குத் தயாராகி வருகிறார்.
பிரித்தானிய நாடாளுமன்றத்தின் புதிய கூட்டத்தொடரைத் தொடக்கி வைத்து, மூன்றாம் சார்லஸ் மன்னர் இன்று (மே 13) உரையாற்றுகிறார்.
ஆளும் லேபர் கட்சிக்குள் நிலவும் கடும் பிளவுகள் மற்றும் தலைமைத்துவ மாற்றக் கோரிக்கைகளுக்கு மத்தியில், பிரதமர் கீர் ஸ்டார்மர் தனது அரசாங்கத்தின் எதிர்காலச் செயல்பாடுகளை முன்வைக்கவுள்ளார்.
அரசரின் உரையில் 35-க்கும் மேற்பட்ட சட்டமூலங்கள் மற்றும் வரைவுச் சட்டங்கள் இடம்பெறவுள்ளதாக எதிர்பார்க்கப்படுகிறது.
கடந்த வாரம் நடைபெற்ற உள்ளூர் தேர்தல்களில் லேபர் கட்சி சந்தித்த பாரிய தோல்வியைத் தொடர்ந்து, ஸ்டார்மரின் தலைமைக்கு எதிராக அமைச்சரவை மற்றும் நாடாளுமன்ற உறுப்பினர்கள் மத்தியில் அதிருப்தி அதிகரித்துள்ளது.
இந்தச் சட்டங்களைச் செயல்படுத்தும் வரை ஸ்டார்மர் பதவியில் நீடிப்பாரா என்ற கேள்வி வெஸ்ட்மின்ஸ்டர் அரசியல் வட்டாரத்தில் வலுவாக எழுந்துள்ளது.
