தரம்சாலாவில் நேற்றிரவு (15) பஞ்சாப் கிங்ஸ் (PBKS) அணிக்கு எதிராக நடைபெற்ற போட்டியில், திலக் வர்மாவின் சிறப்பான துடுப்பாட்டத்தின் மூலமாக மும்பை இந்தியன்ஸ் (MI) அணி 201 ஓட்டங்கள் என்ற இலக்கை வெற்றிகரமாகத் துரத்திப் பிடித்தது.
அதிக ஓட்டங்கள் குவிக்கப்பட்ட இந்தப் போட்டியில், வெறும் நான்கு விக்கெட்டுகளை மட்டுமே இழந்த மும்பை அணி, ஒரு பந்து மீதமிருக்க இலக்கை வெற்றிகரமாகத் துரத்திப் பிடித்தது.
தர்மசாலாவில் உள்ள இமாச்சலப் பிரதேச கிரிக்கெட் சங்க மைதானத்தில் நேற்றிரவு (15) 07.30 மணிக்கு ஆரம்பமான இப் போட்டியில் முதலில் துடுப்பெடுத்தாடிய பஞ்சாப் கிங்ஸ் அணியானது, பிரப்சிம்ரன் சிங்கின் அரைசதம் மற்றும் அஸ்மத்துல்லா ஓமர்சாயின் கடைசி நேர அதிரடி ஆட்டம் ஆகியவற்றின் உதவியால் 20 ஓவர்களில் 8 விக்கெட் இழப்பிற்கு 200 ஓட்டங்களை எடுத்தது.
மும்பை அணி சார்பலி பந்து வீச்சில் சர்துல் தாகூர் அதிகபடியாக 39 ஓட்டங்களுக்கு நான்கு விக்கெட்டுகளை வீழ்த்தினார்.
அவருக்கு அடுத்ததாக தீபக் சாஹர் அதிகபடியாக 2 விக்கெட்டுகளை கைப்பற்றினார்.
பின்னர், ஒரு பெரிய இலக்கைத் துரத்திய மும்பை இந்தியன்ஸ் அணி, தொடக்க ஆட்டக்காரர்களான ரியான் ரிகல்டன் மற்றும் ரோஹித் சர்மா முதல் இரண்டு ஓவர்களில் 13 ஓட்டங்கள் மட்டுமே எடுத்ததால் சேஸிங்கை நிதானமாகத் தொடங்கியது.
எனினும், பின்னர் ரிகல்டன் அதிரடியாக துடுப்பெடுத்தாடி ஆட்டத்தின் போக்கையே மாற்றினார்.
இடது கை ஆட்டக்காரரான அவர், தொடர்ச்சியாக பவுண்டரிகளையும் சிக்ஸர்களையும் விளாசி, பவர்-பிளேயில் ஆதிக்கம் செலுத்தினார்.
தனது வேகமான இன்னிங்ஸின் போது நான்கு பவுண்டரிகளையும் நான்கு சிக்ஸர்களையும் அடித்த அவர், ஆறு ஓவர்களில் மும்பை அணி 59/0 என்ற ஓட்டத்தை எட்ட உதவினார்.
அதே நேரத்தில், மறுமுனையில் ரோஹித் சர்மா சரளமாக ஓட்டங்களைக் குவிக்கத் திணறினார்.
ஏழாவது ஓவரில், வெறும் 23 பந்துகளில் 48 ஓட்டங்களை எடுத்திருந்த ரிகல்டனை ஓமர்சாய் ஆட்டமிழக்கச் செய்தது பஞ்சாப் அணிக்கு இறுதியாக ஒரு திருப்புமுனையாக அமைந்தது.
அடுத்து வந்த நமன் தீர் சிக்ஸருடன் ஒரு சிறிய அதிரடி ஆட்டத்தை வெளிப்படுத்தி, ஜோன்சனின் பந்து வீச்சில் ஒன்பது ஓட்டங்களுடன் ஆட்டமிழந்தார்.
ஆட்ட வேகத்தை அதிகரிக்கச் சிரமப்பட்ட ரோஹித் சர்மா இறுதியில் 26 பந்துகளில் 25 ஓட்டங்கள் எடுத்திருந்த நிலையில் யுஸ்வேந்திர சாஹலின் பந்துவீச்சில் ஆட்டமிழந்தார்.
அடுத்தடுத்து இரண்டு விக்கெட்டுகள் வீழ்ந்த பின்னர், திலக் வர்மா சேஸிங்கின் கட்டுப்பாட்டைத் தன் கையில் எடுத்தார்.
நெருக்கடியான சூழலிலும் நம்பிக்கையுடன் விளையாடிய அவர், தொடர்ந்து பவுண்டரிகளை அடித்ததுடன், ஷெர்ஃபேன் ரதர்ஃபோர்டுடன் இணைந்து சிறப்பாக ஸ்டிரைக்கையும் மாற்றிக்கொண்டார்.
இந்த ஜோடி இன்னிங்ஸை நிலைப்படுத்தி, மும்பையை மெதுவாக இலக்கை நோக்கி நகர்த்தியது.
சஹாலின் பந்துவீச்சில் 106 மீட்டர் தூரத்திற்கு ஒரு பிரம்மாண்டமான சிக்ஸரை அடித்து வர்மா ஆட்டத்தின் போக்கையே முழுவதுமாக மாற்றினார்.
அதைத் தொடர்ந்து அதே ஓவரில் மற்றொரு பவுண்டரியையும் அடித்தார்.
அவருக்கு உறுதுணையாக ரதர்ஃபோர்டும் ஒரு சிக்ஸர் அடித்தார், பின்னர், 17 ஆவது ஓவரில் 21 பந்துகளில் 20 ஓட்டங்கள் எடுத்திருந்த நிலையில் ஓமர்சாயின் பந்துவீச்சில் ஆட்டமிழந்தார்.
தனது ஜோடியை இழந்தபோதிலும், திலக் வர்மா பஞ்சாப் பந்துவீச்சாளர்களைத் தொடர்ந்து தாக்கினார்.
அவர் வெறும் 25 பந்துகளில் அரைசதம் அடித்து, 75 ஓட்டங்களுடன் ஆட்டமிழக்காமல் இருந்தார்.
ஆட்டத்தை வெல்ல உதவிய அவரது இன்னிங்ஸில் ஆறு பவுண்டரிகளும் ஆறு சிக்ஸர்களும் அடங்கும்.
விறுவிறுப்பாக நடைபெற்ற இந்தப் போட்டியில், வில் ஜாக்ஸ் 10 பந்துகளில் 25 ஓட்டங்களை குவித்து ஆட்டத்தை வெற்றிகரமாக முடித்து வைக்க, மும்பை இந்தியன்ஸ் அணி 19.5 ஓவர்களில் நான்கு விக்கட்டுகளை இழந்த நிலையில் இலக்கை விரட்டிப் பிடித்தது.
போட்டியின் ஆட்டநாயகனாக திலக் வர்மா தெரிவானார்.
