எல் நினோ காலநிலை தாக்கத்தால் நிலவும் கடும் வெப்பநிலை, மனநலப் பிரச்சினைகள் அதிகரிக்கக் காரணமாக இருப்பதாக காலி தேசிய வைத்தியசாலையின் ஆலோசனை மனநல மருத்துவர் டாக்டர் ரூமி ரூபன் தெரிவித்துள்ளார்.
நீண்ட நேரம் நேரடி வெயிலுக்கு உட்படுவதால் உடல் வெப்பநிலை அதிகரித்து, அது மனநல நலனிலும் பாதிப்பை ஏற்படுத்தும் என அவர் சுட்டிக்காட்டினார்.
அறிவியல் ஆய்வுகளின்படி, அதிக வெப்பநிலை கோப உணர்வை அதிகரிப்பதோடு, சகிப்புத்தன்மையை குறைத்து, மோதல் மனப்பான்மையை உருவாக்கும் என்றும் அவர் கூறினார். இத்தகைய நிலைமைகள் பின்னர் தீவிரமான உளவியல் பிரச்சினைகளாக மாறக்கூடும் எனவும் எச்சரித்தார்.
குழந்தைகள் மற்றும் முதியவர்கள் இந்த பாதிப்புகளுக்கு அதிகளவில் ஆளாகக்கூடியவர்கள் என்றும், வாகன சாரதிகளுக்கு சாலைகளில் கோபம் அதிகரிக்கலாம் என்றும், குடும்பங்களில் குடும்ப வன்முறைச் சம்பவங்கள் அதிகரிக்கும் அபாயம் இருப்பதாகவும் அவர் தெரிவித்தார்.
ஏற்கனவே மனநலக் கோளாறுகளால் பாதிக்கப்பட்டுள்ளவர்களின் நிலை, அதிக வெப்பநிலையால் மேலும் மோசமடையக்கூடும் எனவும் டாக்டர் ரூபன் குறிப்பிட்டார்.
எனவே, பொதுமக்கள் நேரடி வெயிலில் நீண்ட நேரம் இருப்பதைத் தவிர்க்க வேண்டும் என்றும், போதிய அளவு தண்ணீர் அருந்துவதன் மூலம் இவ்வாறான பாதிப்புகளை ஓரளவு குறைக்க முடியும் என்றும் அவர் அறிவுறுத்தினார்.
