இலங்கையைப் பாதித்துள்ள உலகளாவிய ‘எல் நினோ’ (El Niño) காலநிலை நிலைமை காரணமாக, எதிர்வரும் ஒக்டோபர் மற்றும் நவம்பர் மாதங்களில் நாட்டின் சில பகுதிகளில் வழக்கத்தை விடவும் மழைவீழ்ச்சி அதிகரிக்கக்கூடும் எனவும், அதன் காரணமாகப் பாரிய வெள்ளப்பெருக்கு ஏற்படும் அபாயம் உள்ளதாகவும் வளிமண்டலவியல் திணைக்களம் எச்சரித்துள்ளது.
இது குறித்து வளிமண்டலவியல் திணைக்களத்தின் கணிப்புப் பிரிவின் பணிப்பாளர் அஜித் விஜேமான்ன ஊடகங்களுக்கு விடுத்துள்ள விசேட அறிவிப்பில் இந்த விபரங்கள் தெரிவிக்கப்பட்டுள்ளன.
தற்போது இலங்கைப் பிராந்தியத்தில் பலவீனமான மட்டத்தில் காணப்படும் இந்த ‘எல் நினோ’ நிலைமையானது, இந்த ஆண்டின் இறுதியில் தீவிரமடையவுள்ளதாக சர்வதேச வானிலை ஆராய்ச்சி அமைப்புகள் தெரிவித்துள்ளன.
எதிர்வரும் டிசம்பர், ஜனவரி மற்றும் பெப்ரவரி மாதங்களாகும் போது இந்த ‘எல் நினோ’ நிலைமை மிகவும் வலுவான நிலையை அடைவதற்குக் கிட்டத்தட்ட 60 சதவீதத்திற்கும் அதிகமான சாத்தியக்கூறுகள் உள்ளதாக சர்வதேச நோவா (NOAA) மையம் அதிகாரப்பூர்வமாக அறிவித்துள்ளதாக அவர் குறிப்பிட்டுள்ளார்.
இந்தக் காலநிலை மாற்றத்தின் நேரடித் தாக்கம் காரணமாக, ஜூலை, ஓகஸ்ட் மற்றும் செப்டம்பர் ஆகிய மாதங்களில் இலங்கையில் வழமையாகக் கிடைக்க வேண்டிய மழைவீழ்ச்சி கணிசமாகக் குறையக்கூடும் எனப் பணிப்பாளர் மேலும் தெரிவித்தார்.
குறிப்பாக வரவிருக்கும் ஓகஸ்ட் மாதத்தில் நாட்டின் வெப்பநிலை வழக்கத்தை விடவும் அதிகரிக்கக்கூடும்.
தற்போதைய அறிகுறிகளின்படி செப்டம்பர் மாதத்திலும் மழை குறையவே வாய்ப்புள்ளது.
இருப்பினும், பசிபிக் பெருங்கடலில் ‘டைபூன்’ போன்ற பலத்த சூறாவளிகள் உருவானால் மட்டுமே தற்போதைய வறட்சியான காலநிலை மாற வாய்ப்புள்ளது.
அத்தகைய சூறாவளி நிலைமைகள் தோன்றும் பட்சத்தில், இலங்கையைப் பாதிக்கும் தென்மேற்கு பருவக்காற்று (Southwest Monsoon) சற்றே சுறுசுறுப்படைந்து நாட்டிற்குத் தேவையான மழை கிடைக்கக்கூடும் என்றும் வளிமண்டலவியல் திணைக்களத்தின் கணிப்புப் பிரிவின் பணிப்பாளர் அஜித் விஜேமான்ன சுட்டிக்காட்டியுள்ளார்.
