மத்திய கிழக்கில் போரை முடிவுக்குக் கொண்டுவருவதற்கான அமெரிக்கா மற்றும் ஈரானின் இடைக்கால ஒப்பந்தம் குறித்த விவரங்கள் செவ்வாய்க்கிழமை (16) வெளிவரத் தொடங்கின.
இந்த ஒப்பந்தம் தெஹ்ரானுக்கு அணு ஆயுதப் பயன்பாட்டை நிராகரிக்கும் என்று அமெரிக்க ஜனாதிபதி டொனால்ட் ட்ரம்ப் கூறியதோடு, கையெழுத்திட்டவுடன் ஈரான் எண்ணெய் விற்க இது அனுமதிக்கும் என ஓர் அமெரிக்க அதிகாரியும் தெரிவித்தார்.
இன்னும் பகிரங்கப்படுத்தப்படாத போதிலும், இந்த வாரம் கையெழுத்திடப்பட்ட புரிந்துணர்வு ஒப்பந்தம், போரிடும் நாடுகள் ஒரு நிரந்தரமான போர்நிறுத்தம் குறித்துப் பேச்சுவார்த்தை நடத்த ஏதுவாக, கடந்த ஏப்ரல் மாதம் அறிவிக்கப்பட்ட நிலையற்ற போர்நிறுத்தத்தை மேலும் 60 நாட்களுக்கு நீட்டிக்கிறது.
இந்த ஒப்பந்தத்தின்படி, அமெரிக்கா ஈரானின் துறைமுகங்கள் மீதான தனது முற்றுகையை முடிவுக்குக் கொண்டுவரும்.
அதே நேரத்தில், பெப்ரவரி 28 அன்று அமெரிக்காவும் இஸ்ரேலும் தாக்குதல்களைத் தொடங்கியதிலிருந்து திறம்படத் தடுத்து வந்த ஹார்முஸ் நீரிணை வழியாக எண்ணெய் கப்பல்கள் மற்றும் பிற கடல்வழிப் போக்குவரத்திற்கு தெஹ்ரான் மீண்டும் வழிவிடும்.
தெஹ்ரான் அணு ஆயுதம் வைத்திருக்காது என்று அந்த ஒப்பந்தத்தில் தெளிவாகக் கூறப்பட்டுள்ளது என்றும், அதன் முழு உரை இன்னும் சில நாட்களில் முறைப்படி வெளியிடப்படும் என்றும் அமெரிக்க ஜனாதிபதி தெரிவித்தார்.
ஈரான் அணு ஆயுதத்தை உருவாக்காது என்றும், அதன் அணுசக்தித் திட்டம் அமைதியான நோக்கங்களுக்காக மட்டுமே என்றும் நீண்ட காலமாக கூறி வருகிறது.
ஈரானைத் தாக்குவதற்கு ட்ரம்ப் மாறி மாறி காரணங்களைக் கூறி வருகிறார், ஆனால் அவர் விரும்புவதாகக் கூறியவற்றில் சிறிதளவே சாதித்ததாகத் தெரிகிறது.
ஈரானின் மதகுரு ஆட்சிமுறை தொடர்கிறது, அதன் பாலிஸ்டிக் ஏவுகணைத் திட்டம் கலைக்கப்படவில்லை, மேலும் ஹிஸ்புல்லா போன்ற இஸ்ரேலுக்கு எதிரான ஆயுதக் குழுக்களுக்கான தனது ஆதரவையும் அது கைவிடவில்லை.
நவம்பரில் நடைபெறவிருக்கும் இடைத்தேர்தலுக்கு முன்னதாக, குடியரசுக் கட்சியைச் சேர்ந்த ட்ரம்ப் தனது சொந்தக் கட்சிக்குள்ளேயே விமர்சனங்களை எதிர்கொள்ள இந்த ஒப்பந்தம் வழிவகுக்கிறது.
இதற்கிடையில், பேரழிவை ஏற்படுத்திய போருக்குப் பிறகு பொருளாதார அழுத்தங்களைக் குறைக்கத் தவறினால், ஈரான் தலைவர்கள் மீண்டும் போராட்டங்களை எதிர்கொள்ள நேரிடலாம்.
பேச்சுவார்த்தைகளில் இஸ்ரேல் நேரடியாகப் பங்கேற்கவில்லை.
மேலும், ஏப்ரல் மாத போர் நிறுத்தம் மற்றும் அண்மைய அமெரிக்க-ஈரான் ஒப்பந்தம் ஆகிய இரண்டிலிருந்தும் அது தன்னைத் தனிமைப்படுத்திக் கொண்டுள்ளது.
இது, புதிய போர் நிறுத்தம் நீடிக்குமா என்பதில் நிச்சயமற்ற தன்மையை மேலும் கூட்டுகிறது.
இந்தப் போர், பிராந்தியத்தின் பெரும்பாலான நாடுகளைப் பாதித்துள்ளது.
இதில் 7,000-க்கும் மேற்பட்டோர் கொல்லப்பட்டுள்ளனர். இவர்களில் பெரும்பாலானோர் ஈரான் மற்றும் லெபனானைச் சேர்ந்தவர்கள்.
ஈரானுடன் கூட்டணி வைத்துள்ள ஹிஸ்புல்லா அமைப்பு சண்டையில் இணைந்த பிறகு, மார்ச் மாதம் இஸ்ரேல் லெபனான் மீது படையெடுத்தது.
அமெரிக்கத் துணை ஜனாதிபதி ஜே.டி. வேன்ஸ், இந்த ஒப்பந்தத்தில் இஸ்ரேலும் லெபனானும் அடங்கும் என்று கூறினார்.
இது, இஸ்ரேல் இந்த ஒப்பந்தத்தால் கட்டுப்படாது என்றும், தெற்கு லெபனானிலிருந்து வெளியேறாது என்றும் திங்களன்று கூறிய இஸ்ரேலியப் பிரதமர் பெஞ்சமின் நெதன்யாகுவின் கருத்துக்கு முரணாக உள்ளது.
இஸ்ரேலிய ஆக்கிரமிப்பு முடிவுக்குக் கொண்டுவரப்படாவிட்டால், நிரந்தரப் போர் நிறுத்தத்திற்கு ஈரான் ஒப்புக்கொள்ளாது என்று தங்கள் அமைப்பு நம்புவதாக ஹிஸ்புல்லாவின் செய்தித் தொடர்பாளர் ஒருவர் ரொய்ட்டர்ஸ் செய்தி நிறுவனத்திடம் தெரிவித்தார்.
இதனிடையே, தெற்கு லெபனான் மீதான தனது தாக்குதல்களை நிறுத்தாவிட்டால், இஸ்ரேலுக்குக் கடுமையான பதிலடி கொடுக்கப்படும் என ஈரானின் இராணுவத் தலைமையகமான கதம் அல்-அன்பியா மத்திய தலைமையகம் எச்சரித்துள்ளது.
இந்த ஒப்பந்தம், ஈரான் உடனடியாக எண்ணெய் மற்றும் எரிபொருள் விற்பனையைத் தொடங்க அனுமதிக்கிறது என்றும், இந்த விற்பனையை எளிதாக்குவதற்காக வங்கி, போக்குவரத்து மற்றும் காப்பீட்டுச் சேவைகளையும் உள்ளடக்கியுள்ளது என்றும் ஒரு மூத்த அமெரிக்க அதிகாரி கூறினார்.
தடைகளை நீக்குவதன் மூலமும், வெளிநாட்டுச் சொத்துக்களை முடக்குவதிலிருந்து விடுவிப்பதன் மூலமும் இந்த ஒப்பந்தம் இறுதியில் ஈரானுக்குக் கணிசமான பொருளாதாரப் பலன்களை அளிக்கக்கூடும் என்று அமெரிக்க மற்றும் ஈரானிய அதிகாரிகள் கூறுகின்றனர்.
மேலும், ஈரான் மற்ற நிபந்தனைகளுக்கு இணங்கினால், போரின்போது ஈரானியத் தாக்குதல்களால் பாதிக்கப்பட்ட மற்றும் அமெரிக்க இராணுவத் தளங்களைக் கொண்டுள்ள அண்டை வளைகுடா நாடுகளின் நிதியுதவியுடன் 300 பில்லியன் டொலர் மதிப்பிலான புனரமைப்பு நிதியத்தையும் இது அமைக்கக்கூடும்.
