டிரான்ஸ்ஃபோர்மர்ஸ் திரைப்படத்தில் ஆப்டிமஸ் பிரைம் மற்றும் டிஸ்னியின் வின்னி தி பூ தொடரில் ஈயோர் உள்ளிட்ட பிரபலமான கதாபாத்திரங்களுக்குக் குரல் கொடுத்த நடிகர் பீட்டர் கல்லன் (Peter Cullen), தனது 85 ஆவது வயதில் காலமானார்.
லொஸ் ஏஞ்சல்ஸில் உள்ள அவரது இல்லத்தில் புதன்கிழமையன்று அவர் காலமானதாக ஓர் அறிக்கை தெரிவித்தது.
இந்தக் கனடிய நடிகர், 1984-இல் ‘டிரான்ஸ்ஃபோர்மர்ஸ்’ (Transformers) தொலைக்காட்சித் தொடருக்காக, கம்பீரமான குரல்வளம் கொண்ட நாயகக் கதாபாத்திரமான ‘ஆப்டிமஸ் பிரைம்’ (Optimus Prime) வேடத்துக்கு முதன் முதலில் குரல் கொடுத்தார்.
பின்னர் 2007 முதல் 2023 வரையிலான காலகட்டத்தில் ஏழு ஹாலிவுட் திரைப்படங்களிலும், பிற கிளைத் தொடர்களிலும் அதே கதாபாத்திரத்திரங்களுக்கு மீண்டும் குரல் கொடுத்தார்.
1980-களின் பிற்பகுதியில் வெளியான ‘தி நியூ அட்வென்ச்சர்ஸ் ஆஃப் வின்னி தி பூ’ என்ற தொலைக்காட்சி அனிமேஷன் தொடரிலும், அது தொடர்பான பல நிகழ்ச்சிகள், திரைப்படங்கள் மற்றும் விளையாட்டுகளிலும் மனச்சோர்வுள்ள கழுதையான ஈயோர் கதாபாத்திரத்திற்கு அவர் குரல் கொடுத்தார்.
அவரது மற்ற மறக்கமுடியாத குரல் பாத்திரங்களில், ‘நைட் ரைடர்’ தொலைக்காட்சித் தொடரில் கிட்-இன் தீய எதிர்ப்பாத்திரமான கார்; அர்னால்ட் ஸ்வார்ஸ்னேகரின் 1987 திரைப்படத்தில் வரும் தி பிரிடேட்டரின் கிளிக்கிங் குரல்கள் மற்றும் 1976 இல் கிங் காங்-இன் கர்ஜனைகள் ஆகியவை அடங்கும்.
கல்லன் தனது தொழில் வாழ்க்கையை கனடியத் தொலைக்காட்சி மற்றும் வானொலியில் தொடங்கினார்; பின்னர், குரல் கொடுக்கும் பணியில் கவனம் செலுத்த முடிவெடுப்பதற்கு முன்பு, ‘The Sonny & Cher Show’ போன்ற நிகழ்ச்சிகளில் தொடர்ந்து பங்கேற்று வந்தமை குறிப்பிடத்தக்கது.
