கோதுமை மாவின் விலை அதிகரிக்கப்பட்டதைத் தொடர்ந்து, பரோட்டா மற்றும் முட்டை ரொட்டி உள்ளிட்ட மாவு சார்ந்த உணவுகளின் விலையை 5 ரூபாவால் உயர்த்த அகில இலங்கை உணவக உரிமையாளர்கள் சங்கம் தீர்மானித்துள்ளது.
அத்துடன், சாதாரண அப்பம் ஒன்றின் விலையை 1 ரூபாவினாலும், முட்டை அப்பம் ஒன்றின் விலையை 2 ரூபாவினாலும் உயர்த்தவும் சங்கம் முடிவு செய்துள்ளது.
பிரிமா (Prima) மற்றும் செரண்டிப் (Serendib) ஆகிய நிறுவனங்கள் இன்று முதல் நடைமுறைக்கு வரும் வகையில் ஒரு கிலோகிராம் கோதுமை மாவின் விலையை 17 ரூபாவால் உயர்த்திய நிலையிலேயே, உணவக உரிமையாளர்கள் சங்கம் இந்த விலை உயர்வை அறிவித்துள்ளது.
இதனிடையே, கோதுமை மாவின் திடீர் விலை உயர்வு குறித்து ஆராய்வதற்காக அகில இலங்கை பேக்கரி உரிமையாளர்கள் சங்கத்தின் மத்திய குழு எதிர்வரும் திங்கட்கிழமை அவசரமாகக் கூடவுள்ளது.
அன்றைய கூட்டத்தில் பாண் (Bread) உள்ளிட்ட பேக்கரி உற்பத்திகளின் விலைகளை உயர்த்துவது தொடர்பில் இறுதி முடிவு எடுக்கப்படும் என அச்சங்கத்தின் தலைவர் என்.கே. ஜெயவர்தன தெரிவித்தார்.
