இந்திய மகளிர் கிரிக்கெட் அணியின் தலைவரும், அணியின் முக்கிய வீராங்கனையுமான ஹர்மன்ப்ரீத் கவுர் (Harmanpreet Kaur ), தான் அப்பதவியிலிருந்து விலகுவதாக இன்று (06) அறிவித்தார்.
2026 ஆசிய விளையாட்டுப் போட்டிகளில் இந்திய அணிக்குத் தங்கப் பதக்கம் வென்று தந்ததைத் தொடர்ந்து அவர் இந்த முடிவை எடுத்துள்ளார்.
இதன் மூலம் அவரது சிறப்பான தலைமைத்துவ அத்தியாயம் நிறைவுக்கு வருகிறது.
ஹர்மன்பிரீத் தனது முடிவை நீண்ட இன்ஸ்டாகிராம் பதிவு ஒன்றின் மூலம் அறிவித்தார்.
அதில், தான் தொடர்ந்து இந்திய அணியின் ஒரு பகுதியாக நீடிப்பதை உறுதிப்படுத்தினார்.
அணியின் நீண்டகால நலன்களைக் கருத்தில் கொண்டே இந்த முடிவை எடுத்ததாகவும், தலைமைத்துவத்தில் ஏற்படும் மாற்றம் அணி மேலும் முன்னேற உதவும் என்றும் 37 வயதான அவர் தெரிவித்தார்.
அவரது முடிவின்படி, டெஸ்ட், ஒருநாள் மற்றும் டி20 என மூன்று வகையான போட்டிகளிலுமான தலைவர் பதவியிலிருந்து ஹர்மன்பிரீத் விலகுவார்.
ஹர்மன்ப்ரீத் 2012-ல் முதன்முறையாக இந்திய அணியின் பொறுப்பைத் தற்காலிக அடிப்படையில் ஏற்றார்.
அப்போது மகளிர் டி20 ஆசியக் கிண்ணத்தை இந்தியா வெல்ல அவர் உதவினார்.
2016-ல் அவர் முழுநேர தலைவராக நியமிக்கப்பட்டார்; அதனைத் தொடர்ந்து, இந்திய மகளிர் கிரிக்கெட் வரலாற்றிலேயே மிகச் சிறந்த காலகட்டங்களில் ஒன்றை அவர் வழிநடத்தினார்.
தனது பதவிக்காலத்தில், ஹர்மன்பிரீத் இந்திய அணியை 5 டெஸ்ட் போட்டிகள், 51 ஒருநாள் போட்டிகள் மற்றும் 155 டி20 போட்டிகளில் வழிநடத்தினார்.
குவாஹாட்டியில் ஹர்மன்பிரீத், துணை தலைவராக ஸ்மிருதி மந்தனா, தலைமைப் பயிற்சியாளர் அமோல் முஜும்தார் மற்றும் இந்திய கிரிக்கெட் கட்டுப்பாட்டு வாரியத்தின் (BCCI) செயலாளர் தேவஜித் சைகியா ஆகியோர் பங்கேற்ற கூட்டத்தில் அணியின் திட்டங்கள் குறித்து விவாதிக்கப்பட்டதைத் தொடர்ந்து இந்த முடிவு எடுக்கப்பட்டது.
இன்று வெளியான முந்தைய தகவல்கள், தற்போதைக்கு ஹர்மன்பிரீத் தலைவராக தொடர பிசிசிஐ தயாராக இருந்ததாகத் தெரிவித்திருந்தன.
இருப்பினும், தலைமைப் பொறுப்பில் மாற்றம் செய்வதற்கு இதுவே சரியான தருணம் என்று அந்த அனுபவம் வாய்ந்த வீராங்கனை இறுதியில் முடிவு செய்தார்.
இந்தியாவின் மூன்று வகையான கிரிக்கெட் போட்டிகளிலும் ஹர்மன்ப்ரீத்திற்குப் பின்னர் தலைவராகப் பொறுப்பேற்க, ஸ்மிருதி மந்தனா முதன்மை வேட்பாளராக இருப்பார் என்று பரவலாக எதிர்பார்க்கப்படுகிறது.
ஆசியக் கிண்ணத்தில் இந்தியா முழுமையான வெற்றி பெற்றதைத் தொடர்ந்து இந்த முடிவு எடுக்கப்பட்டுள்ளது.
அதேவேளையில், பல முன்னாள் வீரர்களும் நிபுணர்களும் தலைமைப் பொறுப்பில் மாற்றம் தேவை என்று வலியுறுத்தி வந்தனர்.
தனது அறிக்கையில், பொறுப்பிலிருந்து விலகுவது எளிதான முடிவு அல்ல என்பதை ஒப்புக்கொண்ட ஹர்மன்ப்ரீத், மாற்றத்திற்கான சரியான தருணம் இதுவே என்று தான் கருதுவதாகக் கூறினார்.
இந்திய அணியின் தலைவராக ஹர்மன்ப்ரீத் கௌரின் சாதனை
இந்திய அணியின் தலைவராக ஹர்மன்ப்ரீத் ஒரு சிறப்பான சாதனையை விட்டுச் செல்கிறார்.
தனது பத்தாண்டுகாலத் தலைமைப் பொறுப்பில், அவர் அணியை பல முக்கிய வெற்றிகளுக்கு இட்டுச் சென்றதுடன், மகளிர் சர்வதேச கிரிக்கெட்டில் மிகவும் வெற்றிகரமான தலைவர்களில் ஒருவராகவும் தன்னை நிலைநிறுத்திக்கொண்டார்.
டி20 சர்வதேசப் போட்டிகளைப் பொறுத்தவரை, 155 போட்டிகளில் இந்திய அணியை 92 வெற்றிகளுக்கு வழிநடத்தியதன் மூலம், ஒரு வீராங்கனையாக அதிக வெற்றிகளைப் பெற்ற தலைவர் என்ற சாதனையை ஹர்மன்ப்ரீத் தன்வசம் வைத்துள்ளார்.
ஒருநாள் போட்டிகளில், தலைவராக 51 ஆட்டங்களில் 30 வெற்றிகளை அவர் பதிவு செய்தார்.
சொந்த மண்ணில் நடைபெற்ற 2025 மகளிர் உலகக் கிண்ணத்தில், இந்திய அணியை வரலாற்றுச் சிறப்புமிக்க சாம்பியன் பட்டத்தை வெல்லச் செய்தது அவரது மிகச்சிறந்த சாதனையாக அமைந்தது.
இத்தொடரிலிருந்து ஆரம்பத்திலேயே வெளியேறும் நிலையில் இந்தியா இருந்தபோது, ஹர்மன்பிரீத் தலைமையிலான அணி அபாரமானதொரு மீட்சியை வெளிப்படுத்தியது.
இறுதியில் இறுதிப்போட்டியில் தென்னாப்பிரிக்காவை வீழ்த்தி இந்தியா உலகக் கிண்ணத்தைக் கைப்பற்றியது;
இந்தியாவின் வெற்றியை உறுதி செய்த அந்தத் தீர்க்கமான கேட்சை ஹர்மன்பிரீத் பிடித்தார்.
டெஸ்ட் கிரிக்கெட்டில், ஹர்மன்பிரீத் ஐந்து போட்டிகளில் இந்திய அணியை வழிநடத்தினார்.
தலைவராக அவர் பங்கேற்ற கடைசி டெஸ்ட் போட்டியில், லோர்ட்ஸ் மைதானத்தில் இங்கிலாந்துக்கு எதிராக இந்தியா வரலாற்றுச் சிறப்புமிக்க வெற்றியைப் பெற்றது.
அவரது தலைமையின் கீழ், இந்தியா மூன்று ஆசியக் கிண்ணங்கள், 2025 மகளிர் உலகக் கிண்ணம், இரண்டு ஆசிய விளையாட்டுப் போட்டிகளில் தங்கப் பதக்கங்கள் மற்றும் காமன்வெல்த் விளையாட்டுப் போட்டியில் ஒரு வெள்ளிப் பதக்கம் ஆகியவற்றை வென்றது.
தலைவர் பதவியிலிருந்து ஹர்மன்பிரீத் விலகினாலும், அவர் ஒரு சிறப்பான சாதனையை விட்டுச் செல்கிறார்;
அத்துடன் இந்திய மகளிர் அணியின் முக்கிய உறுப்பினராகவும் தொடர்ந்து நீடிக்கிறார்.
