உயர்நிலைப் பாடசாலை மாணவர்களின் போராட்ட அலை அவர்களின் பெற்றோர், பல்கலைக்கழக மாணவர்கள் மற்றும் தொழிற்சங்கங்கள் வரையிலும் பரவியுள்ள நிலையில், பிரான்ஸ் முழுவதும் இலட்சக்கணக்கான மக்கள் வீதிகளில் இறங்கிப் போராடி வருகின்றனர்.
பாடசாலைகளுக்கு கூடுதல் வளங்கள் மற்றும் காவல்துறையின் அடக்குமுறை குறைப்பு ஆகியவற்றை வலியுறுத்தி, பாரிஸில் உள்ள ‘பிளேஸ் டி லா ரிபப்ளிக்’ (Place de la République) பகுதியிலிருந்து ஏராளமான பதின்ம வயதினர் செவ்வாயன்று (07) பேரணியாகச் சென்றனர்.
லியோனில் காவல்துறையினர் ஆர்ப்பாட்டக்காரர்களுடன் மோதினர்; பாரிஸ் மற்றும் மார்சேயில் கண்ணீர்ப் புகைக் குண்டுகளையும், ரென்னெஸில் நீர்த்தாரை பீரங்கிகளையும் பயன்படுத்தினர்.
ஆனால், முந்தைய போராட்டங்களைப் பாதித்ததைப் போன்ற கடுமையான பிரச்சனைகள் பெரிதாக எதுவும் ஏற்படவில்லை.
செவ்வாய்க்கிழமையன்று 891 உயர் நிலைப் பாடசாலைகளில் (இது மொத்த உயர்நிலைப் பாடசாலை எண்ணிக்கையில் ஏறக்குறைய கால் பகுதியாகும்) செயல்பாடுகள் பாதிக்கப்பட்டதாகவும், அன்றைய தினம் 2,50,000-க்கும் மேற்பட்ட போராட்டக்காரர்கள் வீதிகளில் இறங்கிப் போராடியதாகவும் அரசு தெரிவித்தது.
அதேவேளையில், போராட்டக்காரர்கள் தங்கள் இயக்கத்தின் “மூன்றாம் கட்டம்” (Act Three) என்று அழைத்த இந்தப் போராட்டத்தில், பங்கேற்றவர்களின் எண்ணிக்கை 4,50,000 என்றும், முற்றுகையிடப்பட்ட உயர்நிலைப் பாடசாலைகளின் எண்ணிக்கை 1,800 என்றும் மாணவர் சங்கங்கள் தெரிவித்தன.
