இலங்கையில் காசநோய் நோயாளிகளுக்கான சிகிச்சை தொடர்ந்து கிடைப்பதை உறுதிசெய்யும் வகையில், இந்திய அரசு இன்று அத்தியாவசியமான காசநோய் எதிர்ப்பு மருந்துகள் அடங்கிய தொகுப்பு ஒன்றை இலங்கை அரசிடம் ஒப்படைத்தது.
இலங்கையிலுள்ள இந்திய உயர்ஸ்தானிகராலயத்தின் தகவலின்படி, சுமார் மூன்று தொன் எடையுள்ள இந்தத் தொகுதியில், 52 மில்லியன் ரூபாய் பெறுமதியான 1.5 மில்லியனுக்கும் அதிகமான மாத்திரைகள் உள்ளன.
கொழும்பில் உள்ள சுகாதார அமைச்சகத்தில், இந்திய உயர்ஸ்தானிகர் சந்தோஷ் ஜா, சுகாதார அமைச்சர் நலிந்த ஜயதிஸ்ஸவிடம் மருந்துகளைக் கையளித்தார்.
சுகாதாரத் துறை பிரதி அமைச்சர் ஹன்சக விஜேமுனியும் இந்நிகழ்வில் கலந்துகொண்டார்.
இலங்கை அரசாங்கத்தின் கோரிக்கையை ஏற்று இந்த உதவி வழங்கப்பட்டது.
இதில் காசநோய் சிகிச்சையில் பயன்படுத்தப்படும் அத்தியாவசியமான முதல்-நிலை மருந்துகள் அடங்கும்.
இந்தியாவின் சுகாதாரம் மற்றும் குடும்ப நல அமைச்சகத்தின் உதவியுடன் இம்மருந்துகள் பெறப்பட்டன.
இவை இலங்கையில் காசநோயாளிகளுக்கான சிகிச்சையின் தொடர்ச்சியை மற்றும் மருந்துக் கிடைப்புத்தன்மையை உறுதிப்படுத்த உதவும் என்று எதிர்பார்க்கப்படுகிறது.
2026 ஆகஸ்ட்டில் டெங்கு ஒழிப்பு நடவடிக்கைகளுக்கு ஆதரவளிக்கும் வகையில் இலங்கை அரசின் கோரிக்கையின் பேரில் 500 லிட்டர் ‘டெக்னிக்கல் மேலத்தியோன்’ (Technical Malathion) வழங்கப்பட்டதைத் தொடர்ந்து, தற்போது இந்தச் சுகாதாரத் துறை சார்ந்த கூடுதல் உதவி வழங்கப்பட்டுள்ளது.
