கலகொட அத்தே ஞானசார தேரர் வெலிக்கடை சிறைச்சாலையில் தடுத்து வைக்கப்பட்டிருந்தபோது, வலுக்கட்டாயமாகச் சிறைச் சீருடை அணிவிக்கப்பட்டதாக முன்னாள் அமைச்சர் உதய கம்மன்பில முன்வைத்த குற்றச்சாட்டை சிறைச்சாலைகள் திணைக்களம் மறுத்துள்ளது.
கொழும்பில் ஒக்டோபர் 12 ஆம் திகதி நடைபெற்ற ஊடகவியலாளர் சந்திப்பில் கருத்துத் தெரிவித்த உதய கம்மன்பில, ஞானசார தேரர் மற்றும் சிறைச்சாலை அதிகாரிகளின் எதிர்ப்பையும் மீறி அவருக்குச் சிறைச் சீருடை அணிவிக்கப்பட்டதாகக் குற்றஞ்சாட்டியிருந்தார்.
இந்தக் குற்றச்சாட்டு தொடர்பில் ஊடகவியலாளர்கள் எழுப்பிய கேள்விகளுக்குப் பதிலளித்த சிறைச்சாலைகள் ஆணையாளர் மற்றும் ஊடகப் பேச்சாளர் சேனக பல்லேதன்ன, இவ்வாறான சம்பவம் தொடர்பில் சிறைச்சாலைகள் திணைக்களத்துக்கு எவ்வித முறைப்பாடுகளும் கிடைக்கவில்லை எனத் தெரிவித்தார்.
குறித்த சம்பவம் தொடர்பில் தமக்கு எதுவும் தெரியாது எனக் குறிப்பிட்ட அவர், சிறைச்சாலை அதிகாரிகள் நடைமுறையிலுள்ள சிறைச்சாலை விதிமுறைகளுக்கு அமைவாகவே செயற்படுவதாகவும் தெரிவித்தார்.
இதற்கிடையில், சிறைத்தண்டனை அனுபவிக்கும் மதத் தலைவர்களின் ஆடை விதிமுறைகளை மீளாய்வு செய்வதற்காக நியமிக்கப்பட்டுள்ள குழு தொடர்பிலும் அவர் கருத்துத் தெரிவித்தார்.
குறித்த குழுவில் சிறைச்சாலைகள் ஆணையாளர் கஜநாயக்க உறுப்பினராக நியமிக்கப்பட்டுள்ளதாகத் தெரிவித்த அவர், இந்த விடயம் தொடர்பான பரிந்துரைகள் அடங்கிய அறிக்கை இந்த வாரம் அல்லது அடுத்த வாரம் சமர்ப்பிக்கப்படும் என எதிர்பார்ப்பதாகக் குறிப்பிட்டார்.
குழுவின் பரிந்துரைகளின் அடிப்படையில் சிறைச்சாலைகள் திணைக்களம் நடவடிக்கை எடுக்கும் எனவும், சிறைச்சாலைச் சட்டங்களின் கீழ் நடைமுறையிலுள்ள விதிமுறைகளில் தன்னிச்சையாக மாற்றங்களைச் செய்ய முடியாது எனவும் அவர் மேலும் தெரிவித்தார்.
