சூப்பர்ஸ்டார் ரஜினிகாந்த் நடிப்பில் வெளியான ‘ஜெயிலர் 2’ திரைப்படம் மூன்றாவது நாளாக சனிக்கிழமையன்றும் தனது வசூல் வேட்டையைத் தொடர்ந்தது.
வர்த்தகத் தரவுத் தளமான ‘சாக்னில்க்’ (Sacnilk)-ன் தகவல்படி நேற்று (17) இந்தியாவில் இப்படம் ரூ. 47.80 கோடி நிகர வருவாயை ஈட்டியது.
நாடு முழுவதும் மொத்தம் 14,604 காட்சிகளில் திரையிடப்பட்ட இப்படத்தின் அன்றைய மொத்த வருவாயில், தமிழ் பதிப்பு மிகப்பெரிய பங்களிப்பை வழங்கியது.
தமிழ் பதிப்பு 7802 காட்சிகளின் மூலம் ரூ. 34.60 கோடியும், தெலுங்கு பதிப்பு 2100 காட்சிகளின் மூலம் ரூ. 8.50 கோடியும் ஈட்டியுள்ளன.
இந்தி பதிப்பு 4554 காட்சிகளின் மூலம் ரூ. 4.25 கோடியைச் சேர்த்துள்ளது.
இந்த புள்ளிவிவரங்களுடன், ‘ஜெயிலர் 2’ திரைப்படத்தின் மொத்த இந்திய வசூல் (Gross Collection) ரூ. 169.65 கோடியாகவும், நிகர இந்திய வசூல் (Net Collection) ரூ. 144.60 கோடியாகவும் உயர்ந்துள்ளது.
ஒட்டு மொத்தமாக ‘ஜெயிலர் 2’ திரைப்படம் திரையரங்குகளில் வெளியான முதல் மூன்று நாட்களிலேயே, உலகம் முழுவதும் மொத்தம் 317.15 கோடி ரூபா வசூலைக் கடந்துள்ளது.
‘சாக்னில்க்’ தளத்தின் தகவல்படி, இப்படம் இந்தியாவில் வெளியான முதல் நாளில் ரூ. 59.70 கோடி நிகர வசூலையும், இரண்டாம் நாளில் ரூ. 37.10 கோடி வசூலையும் ஈட்டியது.
வெளிநாடுகளில் கிடைத்த சிறப்பான வரவேற்பின் காரணமாக, இப்படம் திரையரங்குகளில் வெளியான ஆரம்ப கட்டத்திலேயே உலகம் முழுவதும் 300 கோடி இந்திய ரூபா வசூல் என்ற மைல்கல்லைக் கடந்துள்ளது.
நெல்சன் திலீப்குமார் இயக்கத்தில் உருவாகியுள்ள ‘ஜெயிலர் 2’ திரைப்படத்தில், ரஜினிகாந்த் மீண்டும் ‘டைகர் முத்துவேல் பாண்டியன்’ கதாபாத்திரத்தில் நடிக்கிறார்.
இந்த இரண்டாம் பாகத்தில் மோகன்லால், சிவராஜ்குமார், ரம்யா கிருஷ்ணன், விஜய் சேதுபதி, வித்யா பாலன் மற்றும் மிதுன் சக்ரவர்த்தி உள்ளிட்ட பலர் நடித்துள்ளனர்.
படத்திற்கு அனிருத் ரவிச்சந்தர் இசையமைத்துள்ளார்.
