முதலாவது ஒருநாள் போட்டியில், முதலில் துடுப்பெடுத்தாடிய இலங்கை அணி, ஆப்கானிஸ்தான் அணிக்கு 382 ஓட்டங்களை வெற்றி இலக்காக நிர்ணயித்துள்ளது.
கண்டி- பல்லேகலே மைதானத்தில் தற்போது நடைபெற்றுவரும் இப்போட்டியில், நாணய சுழற்சியில் வெற்றிபெற்ற ஆப்கானிஸ்தான் அணி, முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய இலங்கை அணி, நிர்ணயிக்கப்பட்ட 50 ஓவர்கள் நிறைவில் 3 விக்கெட்டுகள் இழப்புக்கு 381 ஓட்டங்களை பெற்றது.
இதில் அணியின் அதிகப்பட்ச ஓட்டங்களாக, பெத்தும் நிஸங்க ஆட்டமிழக்காது 210 ஓட்டங்களையும் அவிஷ்க பெணார்டோ 88 ஓட்டங்களையும் சதீர சமரவிக்ரம 45 ஓட்டங்களையும் பெற்றுக்கொண்டனர்.
ஒருநாள் கிரிக்கெட்டில் வீரரொருவர் பெற்றுக்கொண்ட ஆறாவது அதிகப்பட்ச ஓட்ட எண்ணிக்கை இதுவாகும். அத்துடன், ஒருநாள் கிரிக்கெட்டில் பதிவான 12ஆவது இரட்டை சதம் இதுவாகும்.
ஒருநாள் கிரிக்கெட்டில் பெத்தும் நிஸங்க பெற்றுக்கொண்ட சிறந்த ஓட்ட எண்ணிக்கை இதுவாகும். இதற்கு முன்னதாக, 137 ஓட்டங்கள் அடித்ததே அவரது சிறந்த ஓட்ட எண்ணிக்கையாகும்.
அத்துடன், ஒருநாள் கிரிக்கெட்டில் இலங்கை அணிக்காக வீரரொருவர் பெற்றுக்கொண்ட அதிசிறந்த அதிகப்பட்ச ஓட்ட எண்ணிக்கையை பெத்தும் நிஸங்க பதிவுசெய்தார்.
இதன்மூலம், முன்னாள் வீரர்களான சனத் ஜயசூரிய (189) உபுல் தரங்க (174), குமார் சங்கக்கார (169) மற்றும் டில்ஷான் (161) ஆகியோரின் சாதனைகளை முறியடித்தார்.
அத்துடன் இப்போட்டியில் ஆறாவது அரைசதத்தை கடந்த அணியின் ஆரம்ப துடுப்பாட்ட வீரரான அவிஷ்க பெணார்டோ, ஒருநாள் கிரிக்கெட்டில் ஆயிரம் ஓட்டங்களை கடந்துள்ளார்.
பவுண்ரிகள் மூலம் அதிக ஓட்டங்களை குவித்த வீரர் என்ற சாதனையை பெத்தும் நிஸங்க பதிவுசெய்துள்ளார். அவர் 20 பவுண்ரிகளை அடித்ததன் மூலம் பவுண்ரிகளில் மட்டும் 128 ஓட்டங்களை பெற்றுள்ளார்.
ஆரம்ப துடுப்பாட்ட வீரர்களான பெத்தும் நிஸங்க மற்றும் அவிஷ்க பெணார்டோ ஆகியோர் இணைந்து 182 ஓட்டங்களை இணைப்பாட்டமாக பகிர்ந்துக்கொண்டனர்.
இதன்பிறகு பெத்தும் நிஸங்க மற்றும் சதீர சமரவிக்ரம ஆகியோர் இணைந்து 120 ஓட்டங்களை இணைப்பாட்டமாக பகிர்ந்துக்கொண்டனர்.
ஆப்கானிஸ்தான் அணியின் பந்துவீச்சில், பரீட் அஹமட் மலிக் 2 விக்கெட்டுகளையும் மொஹமட் நபி 1 விக்கெட்டினையும் வீழ்த்தினர்.
தற்போது, 382 ஓட்டங்கள் என்ற கடினமான வெற்றி இலக்கை நோக்கி, இன்னமும் சற்று நேரத்தில் ஆப்கானிஸ்தான் அணி துடுப்பெடுத்தாடவுள்ளது.
ஆப்கானிஸ்தான் அணிக்கெதிராக ஒருநாள் கிரிக்கெட்டில் இலங்கை அணி நிர்ணயித்த அதிகப்பட்ச வெற்றி இலக்காக இந்த ஓட்ட எண்ணிக்கை பதிவாகியுள்ளது.
