மட்டக்களப்பு, சத்துருகொண்டான் படுகொலையில் உயிர்நீத்தவர்களின் 34 ஆவது நினைவேந்தல் நேற்று அனுஷ்டிக்கப்பட்ட நிலையில், குறித்த நினைவுத் தூபிக்கு அருகில் பெரும் பதற்றமானதொரு சூழல் ஏற்பட்டது.
குறித்த தூபியில், புதிதாக ஒரு கல்வெட்டு பதிக்கப்பட்டதை அடுத்தே இந்த பதற்றமானதொரு சூழல் ஏற்பட்டது.
1990 ஆம் ஆண்டு செட்டெம்பர் 9 ஆம் திகதி மட்டக்களப்பு மாவட்டத்தின் கொக்குவில், பனிச்சையடி. பிள்ளையாரடி, சத்துருக் கொண்டான் உள்ளிட்ட பிரதேசங்களைச் சேர்ந்த 85 பெண்கள், 10 வயதுக்கு உட்பட்ட சிறுவர்கள் 42 பேர், 25 வயோதிபர்கள் உட்பட 186 அப்பாவி பொதுமக்கள் இராணுவத்தினராலும் ஊர்காவல் படையினராலும், ஒட்டுக்குழுக்களாலும் படுகொலை செய்யப்பட்டனர்.
இவர்களின் 34 ஆவது நினைவேந்தல் தினம் நேற்றையதினமாகும்.
இந்த நிலையில், இவ்வாறு படுகொலை செய்யப்படவர்களுக்கு அமைக்கப்பட்டிருந்த நினைவு தூபியில் புனர்நிர்மானம் செய்து அதில் ‘இராணுவத்தினால் படுகொலை செய்யப்படவர்கள்’ என்ற பெயர் பொறிக்கப்பட்ட கல்வெட்டு, பதிக்கப்பட்டதை அடுத்தே பதற்றமானதொரு சூழல் ஏற்பட்டது.
குறித்த புதிய கல்வெட்டானது பதிக்கப்பட்டதை அடுத்து, பொலிஸார் அதனை பலவந்தமாக கழற்றி எடுத்து அங்கு புனரமைப்பு செய்யவிடாது தடுத்ததையடுத்துள்ளனர்.
இதனால், அங்கிருந்த பொதுமக்களுக்கும் பொலிஸாருக்குமிடையே பெரும் வாய்த்தர்க்கம் ஏற்பட்டு, முறுகல் நிலைமை தோன்றியது.
1995 ஆம் ஆண்மு சந்திரிக்கா குமார துங்க ஜனாதிபதியாக இருந்தபோது, ஓய்வு பெற்ற நீதியரசர் பாலிகிட்ணன் தலைமையில் இதுதொடர்பாக ஆணைக்குழு அமைக்கப்பட்டதாகவும், அதில் பாதிக்கப்பட்ட மக்களும் அதில் உயிர் தப்பியவர்களும் இராணுவத்தினர் மற்றும் ஊர்காவல் படையினர் படுகொலை செய்தாக சாட்சியமளித்ததாகவும் அதற்கிணங்க, குறித்த வழக்கில் தீா்ப்பு வழங்கப்பட்டதாகவும் பொலிஸாரிடம் இதன்போது தெரிவிக்கப்பட்டது.
இதனடிப்படையில் யாரால் படுகொலை நடந்தது என்று ஏன் கல்வெட்டை பொறிக்க கூடாது எனவும் பொதுமக்கள் கேள்வி எழுப்பி வாதத்தில் ஈடுபட்டனர்.
இந்த நிலையில் தொடர்ந்தும் கல்வெட்டை பதிக்க விடாது பொலிஸார் தடுக்க முற்பட்டபோது அதனை மீறி கல்வெட்டு பதிக்கப்பட்டமையால், பொதுமக்கள் மற்றும் சமூகசெயற்பாட்டாளர்கள் உட்பட 7 பேரை அங்கிருந்து இழுத்துச் சென்ற பொலிஸார், அவர்களிடம் வாக்குமூலம் பெற்றுக் கொண்டனர்.
இதனால், குறித்த பகுதியில் பெரும் பதற்றமானதொரு சூழல் நீண்ட நேரம் காணப்பட்டது.
சம்பவத்தை அடுத்து குறித்த பகுதியில் பொலிஸார் மற்றும் இராணுவத்தினர் குவிக்கப்பட்டு பாதுகாப்பும் பலப்படுத்தப்பட்டுள்ளமை குறிப்பிடத்தக்கது.
