இங்கிலாந்தில் அரையாண்டு விடுமுறை காலத்தில், ஆட்டிசம் (Autism), ADHD மற்றும் பதட்டக் குறைபாடு (Anxiety) போன்ற பாதிப்புகள் உள்ள சிலருக்கு, மாற்றுத்திறனாளிகளுக்கான சிறப்பு வரிசை முறையைப் பயன்படுத்த ஆல்டன் டவர்ஸ் அனுமதி வழங்காது என தெரிவித்துள்ளது.
மெர்லின் எண்டர்டெயின்மெண்ட்ஸ் (Merlin Entertainments) நிறுவனம், தனது தீம் பார்க்குகளில் வரிசையில் நிற்பதில் சிரமம் உள்ள மாற்றுத்திறனாளிகள் அல்லது மருத்துவத் தேவையுள்ள பார்வையாளர்களுக்காக ‘ரைட் அக்சஸ் பாஸ்’ (Ride Access Pass) எனும் அனுமதி வசதியை வழங்கி வருகிறது.
இதேவேளை, இந்த அனுமதி கோருவோரின் எண்ணிக்கை அதிகரித்து வருவதாகவும், இதனால் மாற்றுத்திறனாளிகளே இந்த முறை தங்களுக்குச் சிரமமாக உள்ளதாகவும் அவர்களுக்கான காத்திருப்பு நேரம் அதிகரித்துள்ளதாகக் கூறுவதாகவும் அந்நிறுவனம் தெரிவித்துள்ளது.
இந்த அனுமதியை பெறுவோரின் எண்ணிக்கையைக் குறைக்கும் ஒரு சோதனை முயற்சியாக, செசிங்டன் வேர்ல்ட் ஆஃப் அட்வென்ச்சர்ஸ் (Chessington World of Adventures) மற்றும் வின்ட்சர் லெகோலாண்ட் (Windsor Legoland) ஆகிய இடங்களிலும் புதிய கட்டுப்பாடுகள் அமுல்படுத்தப்பட உள்ளன.
இந்நிலையில் நரம்பியல் ரீதியாக மாறுபட்ட தன்மை கொண்டவர்கள் (Neurodiverse people) அதிகக் கூட்டத்திற்கு நடுவில் இருக்கும்போது மன உளைச்சலுக்கு ஆளாகலாம் அல்லது அவர்களுக்குப் பதட்டமான சூழல் (Panic attacks) ஏற்படலாம் என தெரிவிக்கப்படுகிறது.
இதுவரை, கூட்டத்தில் சிரமபடுபவர்கள் இந்த சிறப்பு அனுமதியை பெறத் தகுதியுடையவர்களாக இருந்தனர். ஆனால், இந்த விடுமுறை கால சோதனையின் போது, “நிற்பதில் சிரமம்”, “சமதள அணுகல் தேவைப்படுவோர்” அல்லது “அவசர கழிப்பறை தேவை உள்ளவர்கள்” மட்டுமே இதற்குத் தகுதியுடையவர்களாகக் கருதப்படுவதுடன் ஏனையவர்கள் வழக்கமான வரிசையில் காத்திருக்க வேண்டும் என தெரிவிக்கப்படுகின்றமை குறிப்பிடத்தக்கது.
