இலங்கைக்கு வருகை தந்துள்ள சர்வதேச நாணய நிதியத்தின் (IMF) முகாமைத்துவப் பணிப்பாளர் கலாநிதி கிறிஸ்டலினா ஜோர்ஜீவா நேற்று (17) இலங்கை மத்திய வங்கிக்கு விஜயம் செய்தார்.
இலங்கையின் சர்வதேச நாணய நிதிய உறுப்பினர் சேர்க்கையின் 75 ஆவது ஆண்டு நிறைவையும், இலங்கை மத்திய வங்கியின் 75 ஆவது ஆண்டு நிறைவையும் முன்னிட்டு இந்த விஜயம் அமைகிறது.
இந்த பயணத்தில் இலங்கை மத்திய வங்கி வளாகத்தில் நடைபெற்ற ஒரு கூட்டத்தில் கிறிஸ்டலினா ஜோர்ஜீவா, ஆளுநர் கலாநிதி நந்தலால் வீரசிங்க மற்றும் மத்திய வங்கியின் மூத்த அதிகாரிகளைச் சந்தித்தார்.
இந்தக் கூட்டத்தின் போது, தற்போதைய விரிவாக்கப்பட்ட நிதி வசதியின் (EFF) கீழ் வழங்கப்பட்ட உறுதியான ஆதரவிற்கும், கடன் மறுசீரமைப்பு செயல்முறையை நிறைவு செய்வதில் தீவிரமாக உதவியதற்கும், நாடு முன்னெப்போதும் இல்லாத பொருளாதார நெருக்கடியிலிருந்து மீள்வதற்கு உதவியதற்கும் ஆளுநர், நிர்வாக பணிப்பாளர் மற்றும் அவரது குழுவினருக்கு மனமார்ந்த நன்றியைத் தெரிவித்துக் கொண்டார்.
தற்போதைய IMF திட்டத்தின் கீழ் இலங்கையின் செயல்திறனை ஒரு வெற்றியாக கிறிஸ்டலினா ஜோர்ஜீவா அங்கீகரித்தார்.
பொருளாதார நெருக்கடியைத் தொடர்ந்து பேரண்டப் பொருளாதார ஸ்திரத்தன்மையை மீட்டெடுப்பதில் மத்திய வங்கியின் பங்கையும் மேலாண்மையும் அவர் ஒப்புக்கொண்டார்.
அண்மைய ஆண்டுகளில் இலங்கை எதிர்கொண்ட தொடர்ச்சியான பின்னடைவுகளைக் குறிப்பிட்டாலும், தேவையான கட்டமைப்பு சீர்திருத்தங்கள் தொடங்கப்பட்டு நீடித்தால், நாடு அதிக வளர்ச்சி அடைய முடியும் என்றும் அவர் நம்பிக்கை தெரிவித்தார்.
