ஈரானில் அமெரிக்க இராணுவம் தனது இலக்குகளை ஏறக்குறைய அடைந்துவிட்டதாக ஜனாதிபதி டொனால்ட் ட்ரம்ப் புதன்கிழமை (02) இரவு தொலைக்காட்சியில் ஆற்றிய உரையில் நாட்டு மக்களிடம் தெரிவித்தார்.
ஈரானின் கடற்படை மற்றும் விமானப்படையை அமெரிக்கா அழித்துவிட்டதாகவும், தெஹ்ரானின் பாலிஸ்டிக் ஏவுகணை மற்றும் அணுசக்தித் திட்டங்களை முடக்கிவிட்டதாகவும் ட்ரம்ப் இதன்போது கூறினார்.
எனினும், மோதலை முடிவுக்குக் கொண்டுவருவதற்கான உறுதியான காலக்கெடுவை அவர் தெரிவிக்க மறுத்துவிட்டார்.
மேலும், இந்த உரையில் அடுத்த இரண்டு முதல் மூன்று வாரங்களுக்கு இஸ்லாமியக் குடியரசில் உள்ள இலக்குகளை அமெரிக்கா தொடர்ந்து தாக்கும் என்றும், இந்தப் பணியை மிக வேகமாக முடிக்கும் என்றும் அவர் பார்வையாளர்களுக்கு உறுதியளித்தார்.
ஆனால், தனது 19 நிமிட உரையின் போது, ஈரானின் செறிவூட்டப்பட்ட யுரேனியத்தின் நிலை மற்றும் ஹார்முஸ் நீரிணை வழியாக அணுகல் போன்ற தீர்க்கப்படாத சில பிரச்சினைகளை அவர் மேலோட்டமாகப் பேசினார்.
ஹார்முஸ் நீரிணை என்பது உலகளாவிய எண்ணெய் விநியோகத்திற்கான ஒரு வழித்தடமாகும்.
பெப்ரவரி 28 அன்று அமெரிக்காவும் இஸ்ரேலும் போரைத் தொடங்கியதிலிருந்து ஈரான் இந்த வழியைத் திறம்பட மூடிவிட்டது.
மேலும், பேச்சுவார்த்தைகளின் போது ஈரானியத் தலைவர்கள் அமெரிக்காவின் நிபந்தனைகளுக்கு இணங்கவில்லை என்றால், போர் தீவிரமடையக்கூடும் என்றும், ஈரானின் எரிசக்தி மற்றும் எண்ணெய் உள்கட்டமைப்புகள் மீது தாக்குதல்கள் நடத்தப்பட வாய்ப்புள்ளது என்றும் அவர் பிரதானமாக குறிப்பிட்டார்.
அத்துடன், தற்போது ஐந்தாவது வாரத்தில் இருக்கும் ஒரு போரைப் பற்றி சரியான கண்ணோட்டத்துடன் சிந்திக்குமாறு அமெரிக்கர்களை அவர் கேட்டுக்கொண்டார்.
மேலும், இதற்கு முன்னர் நடந்த பல போர்களில் அந்நாடு ஈடுபட்டிருந்ததை விட இந்த மோதல் மிகவும் குறுகிய காலமே நீடித்தது என்பதையும் ட்ரம்ப் சுட்டிக்காட்டினார்.
போரைக் கண்டு அஞ்சும் அமெரிக்கப் பொதுமக்களையும், சரிந்துவரும் மக்கள் ஆதரவு மதிப்பீடுகளையும், தனது போர் நோக்கங்களை இன்னும் துல்லியமான மற்றும் சீரான சொற்களில் கோடிட்டுக் காட்டுமாறு சில நட்பு நாடுகளிடமிருந்து வந்த அழுத்தங்களுக்கு மத்தியில் அவரது இந்தக் கருத்துக்கள் வந்துள்ளன.
ட்ரம்பும் அவரது ஆலோசகர்களும் இந்த மோதலுக்கான விளக்கங்களையும் காலக்கெடுவையும் மாறி மாறி அளித்து வருகின்றனர்.
சில நட்பு நாடுகள், அமெரிக்கர்களிடையே வளர்ந்து வரும் கவலைகளைத் தணிக்குமாறு ஜனாதிபதி ட்ரம்பை வலியுறுத்தி வருகின்றன.
அவர்களில் பெரும்பாலோர் இந்த மோதலை எதிர்ப்பதோடு, உலகளாவிய எண்ணெய் விநியோகத்தில் ஏற்பட்ட இடையூறுகளால் உயர்ந்து வரும் பெட்ரோல் விலையால் அதிருப்தியில் உள்ளனர்.
