தொடர்ந்து இரண்டாவது நாளாகவும், தமிழக வெற்றிக் கழகத்தின் (TVK) தலைவர் விஜய் முன்வைத்த ஆட்சி அமைக்கும் திட்டத்தை தமிழக ஆளுநர் ராஜேந்திர அர்லேகர் இன்று (06) நிராகரித்தார்.
ஆட்சி அமைக்க உரிமை கோருவதற்காக விஜய் இன்று மீண்டும் ராஜ்பவனில் ஆளுநரை சந்தித்தார்.
ஆனால் 118 சட்டமன்ற உறுப்பினர்களின் ஆதரவைப் பெற்ற பின்னரே திரும்புமாறு ஆளுநர் அவரிடம் கேட்டுக்கொண்டதாக தகவல்கள் தெரிவிக்கின்றன.
இந்திய ஊடகங்களின் தகவலின்படி, தேவையான உறுப்பினர்களின் எண்ணிக்கை இன்னும் டிவிகே கட்சியிடம் குறைவாக உள்ளதாகவும், பதவியேற்பு விழா நடைபெறுவதற்கு முன்பு 118 சட்டமன்ற உறுப்பினர்களின் கையொப்பங்களுடன் மீண்டும் வருமாறும் ஆளுநர் விஜய்யிடம் கூறியுள்ளதாக தெரிவிக்கப்படுகிறது.
நேற்றைய தினமும், விஜய் 112 சட்டமன்ற உறுப்பினர்களின் ஆதரவுடன் ஆளுநரைச் சந்தித்து ஆட்சி அமைக்க உரிமை கோரியிருந்தார்.
ஐந்து சட்டமன்ற உறுப்பினர்களைக் கொண்ட காங்கிரஸின் ஆதரவை விஜய் பெற்றிருந்தபோதிலும், தனக்குக் கட்சியின் ஆதரவு இருப்பதாகவும், பலத்தை மேலும் வலுப்படுத்த கூடுதல் அவகாசம் கோரியதாகவும் அவர் ஆளுநரிடம் வாய்மொழியாகத் தெரிவித்ததாகத் தகவல்கள் தெரிவிக்கின்றன.
இருப்பினும், ஆளுநர் அர்லேகர், உறுப்பினர்களின் எண்ணிக்கை போதுமானதாக இல்லை என்று அவரிடம் கூறி, 118 சட்டமன்ற உறுப்பினர்களின் ஆதரவுடன் திரும்புமாறு கேட்டுக்கொண்டதால், புதிய சுற்று அரசியல் முயற்சிகள் தூண்டப்பட்டன.
இதனிடையே, விடுதலைச் சிறுத்தைகள் கட்சி (விசிக) தலைவர் தொல் திருமாவளவன், விஜய்யை ஆட்சி அமைக்க அழைக்குமாறும், சபையில் தனது பெரும்பான்மையை நிரூபிக்க அவருக்கு வாய்ப்பளிக்குமாறும் ஆளுநர் அர்லேகரிடம் இன்று வலியுறுத்தினார்.
பிராந்திய ஊடகங்களிடம் பேசிய திருமாவளவன், பாஜக தமிழக அரசியலில் தலையிட்டு குழப்பத்தை ஏற்படுத்துவதாகக் குற்றம் சாட்டினார்.
தனிப்பெரும் கட்சியின் தலைவர் என்ற முறையில், விஜய் பதவியேற்க அனுமதிக்கப்பட்டு, பின்னர் சட்டமன்றத்தில் தனது பெரும்பான்மையை நிரூபிக்க வேண்டும், அதுதான் அரசியலமைப்புச் சட்டம் வழங்கியுள்ள வழிகாட்டுதல் என்று அவர் கூறினார்.
இந்திய கம்யூனிஸ்ட் கட்சியின் தமிழ்நாடு பிரிவும், ஆளுநர் அரசியலமைப்பின்படி செயல்பட வேண்டும் என்று வலியுறுத்தியதுடன், பதவியேற்பு விழாவுக்கு முன்பு விஜய்யை தனது பெரும்பான்மையை நிரூபிக்கக் கேட்பது “பொருத்தமற்றது” என்றும் கூறியது.
2026 தமிழக சட்டமன்றத் தேர்தலில் விஜய் வென்ற இரண்டு இடங்களில் ஒன்றை அவர் காலி செய்யவிருப்பதால், அவையில் டிவிகேயின் பலம் 107 ஆகக் குறையும்.
காங்கிரஸுடன் சேர்ந்து, இந்தக் கூட்டணியில் தற்போது 112 உறுப்பினர்கள் உள்ளனர்.
இது பெரும்பான்மைக்குத் தேவையான எண்ணிக்கையை விட ஐந்து உறுப்பினர்கள் குறைவாகும்.
இந்திய அரசியலமைப்பின் 164(1)வது பிரிவு, முதலமைச்சரை நியமிக்கும் அதிகாரத்தை ஆளுநருக்கு வழங்குகிறது.
தொங்கு சட்டமன்றம் இருக்கும் பட்சத்தில், முதலமைச்சர் பதவிக்கு சரியான வேட்பாளரைத் தீர்மானிக்கும் விருப்ப அதிகாரத்தையும் அரசியலமைப்பு ஆளுநருக்கு வழங்குகிறது.
வரலாற்று ரீதியாக, பல மாநிலங்களில் உள்ள ஆளுநர்கள், சிறுபான்மை அரசாங்கத்தை அமைப்பதற்காக, தனிப்பெரும் கட்சியின் தலைவரை அழைத்துள்ளமையும் குறிப்பிடத்தக்கது.
