தணிக்கைச் சான்றிதழ் தொடர்பான சிக்கலால் தாமதமடைந்த தளபதி விஜய்யின் இறுதி திரைப்படமான ‘ஜனநாயகன்’ வியாழக்கிழமை (23) திரையரங்குகளில் வெளியானது.
ரசிகர்களின் பெரும் உற்சாகம் மற்றும் எதிர்பார்ப்புகளுக்கு மத்தியில், ‘சாக்னில்க்’ (Sacnilk) தரவுகளின்படி முதல் நாள் வசூலாக இப்படம் உள்நாட்டுச் சந்தையில் 41 கோடி இந்திய ரூபாவை ஈட்டியுள்ளது.
இப்படம் இந்த ஆண்டின் மிகப்பெரிய தமிழ் திரைப்பட வெளியீடுகளில் ஒன்றாக அமைந்தாலும், விஜய்யின் முந்தைய படங்களான ‘பீஸ்ட்’ (Beast) மற்றும் ‘கோட்’ (GOAT) ஆகியவற்றின் முதல் நாள் உள்ளூர் வசூலை முறியடிக்கத் தவறிவிட்டது.
மேலும், வெளியான முதல் நாளிலேயே 50 கோடி ரூபாய் வசூல் மைல்கல்லை எட்டிய தமிழ் படங்களின் பட்டியலில் இடம்பிடிக்கும் வாய்ப்பையும் இப்படம் தவறவிட்டது.
வர்த்தகத் தரவு கண்காணிப்பு நிறுவனமான Sacnilk தகவலின்படி, ‘ஜனநாயகன்’ திரைப்படம் வெளியான முதல் நாளில் இந்தியா முழுவதும் 13,067 காட்சிகளின் மூலம் ரூ. 41 கோடி நிகர வருவாயை ஈட்டியது.
திரையரங்குகளில் வெளியான முதல் நாளுக்குப் பின்னர், இப்படத்தின் மொத்த வசூல் ரூ. 48.27 கோடியாகவும், நிகர வசூல் ரூ. 41 கோடியாகவும் உள்ளது.
வெளிநாட்டுச் சந்தையில் இப்படம் ரூ. 30 கோடியை ஈட்டியது.
இதன் மூலம் அதன் உலகளாவிய மொத்த வசூல் ரூ. 78.27 கோடியாக உயர்ந்தது.
‘ஜனநாயகன்’ திரைப்படம் நல்லதொரு தொடக்கத்தைப் பெற்றிருந்தாலும், விஜய்யின் இறுதி திரைப்படமான இதனால் முதல் நாள் வசூல் சாதனையை முறியடிக்க முடியவில்லை.
‘பீஸ்ட்’ திரைப்படம் முதல் நாளில் ரூ. 49.30 கோடி நிகர வசூலையும், ‘கோட்’ திரைப்படம் ரூ. 44 கோடி நிகர வசூலையும் ஈட்டியிருந்தன.
ஒரு சில குறிப்பிட்ட தமிழ் படங்கள் மட்டுமே உள்ளூரில் எட்டியுள்ள ரூ. 50 கோடி எனும் முதல் நாள் வசூல் மைல்கல்லை ‘ஜனநாயகன்’ படத்தால் எட்ட முடியவில்லை.
தமிழ் சினிமாவில் மிகப்பெரிய தொடக்க வசூலைப் பெற்ற படங்களில், விஜய்யின் ‘லியோ’ (Leo) திரைப்படம் முதல் நாளில் ரூ. 64.80 கோடியுடன் மிகச்சிறந்த தொடக்கங்களில் ஒன்றாகத் தொடர்ந்து நீடிக்கிறது.
ரஜினிகாந்தின் ‘கூலி’ ரூ. 65 கோடியுடன் முதலிடத்தில் உள்ளது.
அதேநேரம், 2.0 ரூ. 60.25 கோடியுடன் மூன்றாவது இடத்தில் உள்ளன.
எச்.வினோத் இயக்கத்தில் உருவாகியுள்ள ‘ஜனநாயகன்’ படத்தில், தளபதி விஜய் முதன்மை கதாபாத்திரத்தில் நடிக்க, அவருடன் பூஜா ஹெக்டே, பாபி தியோல், பிரகாஷ் ராஜ், கௌதம் வாசுதேவ் மேனன், பிரியாமணி, மமிதா பைஜு, நரேன் மற்றும் பல நடிகர்கள் இணைந்து நடித்துள்ளனர்.
திரையரங்குகளில் வெளியாவதற்கு முன்னதாக, தணிக்கைச் சான்றிதழ் பெறுவதில் ஏற்பட்ட தாமதத்தால் ‘ஜனநாயகன்’ படத்தின் வெளியீட்டில் சிக்கல் எழுந்தது.
இதனால், திட்டமிட்டபடி இப்படம் திரையரங்குகளுக்கு வருமா என்பது குறித்த நிச்சயமற்ற சூழல் உருவாகியிருந்தமையும் குறிப்பிடத்தக்கது.
