விஷ்மி, ஹர்ஷிதா சதங்களால் வரலாற்றுச் சாதனை: பாகிஸ்தானை வீழ்த்தி ஒருநாள் தொடரைச் சமன் செய்தது இலங்கை!

ஹம்பாந்தோட்டை மகிந்த ராஜபக்ஷ சர்வதேச மைதானத்தில் நடைபெற்ற பாகிஸ்தானுக்கு எதிரான இரண்டாவது ஒருநாள் கிரிக்கெட் போட்டியில், இலங்கை மகளிர் அணி 274 ஓட்டங்கள் என்ற கடினமான இலக்கை அதிரடியாக விரட்டிப் பிடித்து 8 விக்கெட்டுகள் வித்தியாசத்தில் அபார வெற்றி பெற்றது.

இதன் மூலம் 3 போட்டிகள் கொண்ட ஒருநாள் தொடரை இலங்கை அணி 1-1 எனச் சமன் செய்துள்ளதுடன், தொடரைக் கைப்பற்றும் வாய்ப்பையும் தக்கவைத்துள்ளது.

போட்டியில் முதலில் துடுப்பெடுத்தாடிய பாகிஸ்தான் மகளிர் அணி நிர்ணயிக்கப்பட்ட 50 ஓவர்களில் 5 விக்கெட் இழப்பிற்கு 273 ஓட்டங்களைக் குவித்தது.

பாகிஸ்தான் தரப்பில் தொடக்க ஆட்டக்காரர் சித்ரா அமீன் (Sidra Amin) பொறுப்பான ஆட்டத்தை வெளிப்படுத்தி 120 பந்துகளில் 13 பவுண்டரிகளுடன் ஆட்டமிழக்காமல் 100 ஓட்டங்கள் எடுத்தார்.

அவருக்கு உறுதுணையாக ஆயிஷா ஜாபர் 49 ஓட்டங்களையும், முனீபா அலி 45 ஓட்டங்களையும், பாத்திமா சனா அதிரடியாக 18 பந்துகளில் 25 ஓட்டங்களையும் சேர்த்தனர்.

இலங்கை பந்துவீச்சில் சமரி அத்தபத்து, சேத்தனா விமுக்தி, இனோகா ரணவீர மற்றும் கவிஷா தில்ஹாரி ஆகியோர் தலா ஒரு விக்கெட்டைக் வீழ்த்தினர்.

274 ஓட்டங்கள் என்ற இலக்கை நோக்கிப் பதிலளித்துத் துடுப்பெடுத்தாடிய இலங்கை அணிக்கு ஆரம்பத்திலேயே பேரிடி காத்திருந்தது.

அணியின் நட்சத்திர ஆட்டக்காரரும் தலைவியுமான சமரி அத்தபத்து வெறும் 1 ஓட்டத்துடன் பாத்திமா சனாவின் பந்துவீச்சில் ஆட்டமிழந்தார்.

அப்போது இலங்கை அணி 20 ஓட்டங்களுக்கு 1 விக்கெட்டை இழந்து தடுமாறியது.

இதனைத் தொடர்ந்து களமிறங்கிய தொடக்க ஆட்டக்காரர் விஷ்மி குணரத்ன மற்றும் ஹர்ஷிதா சமரவிக்ரம ஆகிய இருவரும் பாகிஸ்தான் பந்துவீச்சை நாலாபுறமும் சிதறடித்தனர்.

107 பந்துகளில் தனது சதத்தைப் பூர்த்தி செய்த அவர், 11 பவுண்டரிகள் மற்றும் ஒரு சிக்ஸருடன் 123 ஓட்டங்கள் குவித்து ஆட்டமிழந்தார்.

நிதானமாக ஆடத் தொடங்கிப் பின்னர் அதிரடி காட்டிய அவர், 119 பந்துகளில் தனது சதத்தைப் பதிவு செய்து 100 ஓட்டங்களுடன் ஆட்டமிழக்காமல் களத்தில் இருந்தார்.

இரண்டாவது விக்கெட்டுக்காக இவ்விருவரும் இணைந்து சேர்த்த 203 ஓட்டங்கள், இலங்கை மகளிர் கிரிக்கெட் வரலாற்றில் மிகச்சிறந்த கூட்டாண்மையாகப் பதிவானது.

விஷ்மி குணரத்ன ஆட்டமிழந்த போது இலங்கை அணியின் வெற்றி உறுதியாகியிருந்தது.

இறுதிக்கட்டத்தில் களமிறங்கிய கவிஷா தில்ஹாரி 33 பந்துகளில் 5 பவுண்டரிகளுடன் அதிரடியாக 40 ஓட்டங்களைக் குவிக்க, இலங்கை அணி 46.5 ஓவர்களிலேயே (19 பந்துகள் மீதமிருக்க) 2 விக்கெட்டுகளை மட்டுமே இழந்து 274 ஓட்டங்களை எட்டி வரலாற்று வெற்றி பெற்றது.

இவ்விரு அணிகளுக்கும் இடையிலான தொடரைத் தீர்மானிக்கும் இறுதி ஒருநாள் போட்டி இதே மைதானத்தில் நடைபெறவுள்ளது.