Visual Art Movies நிறுவனத்தின் நான்காவது முழுநீளத் திரைப்படமாக உருவாகி வரும் புதிய திரைப்படத்திற்கு ‘கயிறு’ (KAYIRU) எனப் பெயரிடப்பட்டுள்ளதாக அதிகாரப்பூர்வமாக அறிவிக்கப்பட்டுள்ளது.
நேற்று திரைப்படத்தின் தலைப்பு அறிமுகப்படுத்தப்பட்டதுடன், வழக்கமான போஸ்டர் அல்லது டீசர் வெளியீட்டு முறைகளுக்கு மாறாக, சிறப்பாக உருவாக்கப்பட்ட பாடல்வரிக் காணொளி (Lyrical Video) மூலம் தலைப்பு அறிமுகப்படுத்தப்பட்டுள்ளமை குறிப்பிடத்தக்கது.
Visual Art Movies நிறுவனத்தின் தயாரிப்பில் உருவாகும் இத்திரைப்படத்திற்கு ப. முரளிதரன் கதை, திரைக்கதை மற்றும் இயக்கத்தை மேற்கொள்கிறார். திரைப்படத்தின் கதையையும் அதன் உணர்வுகளையும் பிரதிபலிக்கும் வகையில் பாடல் உருவாக்கப்பட்டுள்ளதாக தெரிவிக்கப்படுகிறது.
திரைப்படத்தின் மையக்கருத்தை இசை மற்றும் காட்சிகளின் ஊடாக பார்வையாளர்களுக்கு அறிமுகப்படுத்தும் நோக்கில் இந்தப் பாடல்வரிக் காணொளி உருவாக்கப்பட்டுள்ளதாக இயக்குநர் முன்னதாக வெளியிட்டிருந்த காணொளியில் குறிப்பிட்டிருந்தார்.
இந்நிலையில், ‘கயிறு’ திரைப்படத்தின் பாடல் தற்போது வெளியாகியுள்ளமை இலங்கைத் தமிழ் சினிமா வட்டாரத்தில் வித்தியாசமான திரைப்பட அறிமுக முயற்சியாக பார்க்கப்படுகிறது.
Visual Art Movies நிறுவனத்தின் ‘மாயை மற’, ‘தளராதவன்’ மற்றும் ‘போடியார்’ ஆகிய திரைப்படங்களைத் தொடர்ந்து உருவாகும் நான்காவது முழுநீளத் திரைப்படம் இதுவாகும்.
இத்திரைப்படத்தின் கதை இலங்கையின் வடகிழக்குப் பகுதிகள், அனுராதபுரம் உள்ளிட்ட பல்வேறு பிரதேசங்களில் இடம்பெற்ற சம்பவங்களை அடிப்படையாகக் கொண்டுள்ளதாக தெரிவிக்கப்பட்டுள்ளது. மேலும், படப்பிடிப்புகள் இலங்கையின் பல்வேறு பகுதிகளில் இடம்பெறவுள்ளதாகவும் தயாரிப்புத் தரப்பு தெரிவித்துள்ளது.
‘கயிறு’ திரைப்படத்தின் இந்த வித்தியாசமான அறிமுகம் தொடர்பில் திரையுலக இரசிகர்கள் மற்றும் கலை ஆர்வலர்கள் மத்தியில் எதிர்பார்ப்பும் அதிகரித்துள்ளது.
