தனமல்வில பொலிஸ் தலைமையகத்தின் நிக்கவேவ பகுதியில் உள்ள கஞ்சா பண்ணை ஒன்றில் சோதனை நடத்தி, அதன் உரிமையாளர்களிடமிருந்து ஐந்து இலட்சம் ரூபாய் இலஞ்சம் பெற்றதாக சந்தேகத்தின் பேரில் கைது செய்யப்பட்ட நான்கு பொலிஸ் அதிகாரிகளை வெல்லவாய நீதவான் நீதிமன்றம் பிணையில் விடுவிக்க உத்தரவிட்டுள்ளது.
அவர்கள் ஒவ்வொருவரும் ஐம்பதாயிரம் ரூபாய் ரொக்கப் பிணையிலும், தலா இரண்டு இலட்சம் ரூபாய் மதிப்புள்ள இரண்டு பிணை பத்திரங்களிலும் விடுவிக்கப்பட்டுள்ளனர்.
மொனராகல பிரதேச ஊழல் ஒழிப்புப் பிரிவைச் சேர்ந்த பொலிஸ் அதிகாரிகள் குழு ஒன்று நிக்கவேவ பகுதியில் நடத்திய சோதனையில், கஞ்சா பண்ணையின் உரிமையாளரிடமிருந்து ஐந்து இலட்சம் ரூபாய் இலஞ்சம் பெறப்பட்டது அம்பலமானது.
கைது செய்யப்பட்டவர்களில், மொனராகல பிரதேச ஊழல் ஒழிப்புப் பிரிவைச் சேர்ந்த இரண்டு பொலிஸ் சார்ஜென்ட்கள், ஒரு பொலிஸ் காவலர் மற்றும் ஒரு பொலிஸ் காவலர் ஓட்டுநர் ஆகியோர் அடங்குவதாக பொலிஸ் அதிகாரிகள் தெரிவித்தனர்.
இச்சம்பவம் தொடர்பான மேலதிக விசாரணைகளை தனமல்வில தலைமையக பொலிஸ் நிலையம் மேற்கொண்டு வருகிறது.
