ஐக்கிய அரபு அமீரகத்தில் நடைபெற்று வரும் 2026 மகளிர் ஆசியக் கிண்ணப் போட்டியில் இலங்கை அணியானது நேற்றைய (02) தினம் இந்தோனேஷியாவை எளிதாக வீழ்த்தியது.
அணித் தலைவி சமரி அதபத்து முன்னின்று வழிநடத்த, இலங்கை அணி இந்தோனேசியாவை 75 ஓட்டங்கள் வித்தியாசத்தில் எளிதாக வீழ்த்தியது.
125 ஓட்டங்கள் என்ற வெற்றி இலக்கை எதிரணியினர் துரத்தியபோது, சாமரி அதபத்து 3.3 ஓவர்கள் பந்துவீசி 5 ஓட்டங்களை மட்டுமே விட்டுக்கொடுத்து 7 விக்கெட்டுகளைக் கைப்பற்றினார்.
இதில் ஒரு ‘ஹெட்ரிக்’ (தொடர்ச்சியாக மூன்று விக்கெட்டுகள்) சாதனையும் அடங்கும்.
அவரது இந்த திறன், மகளிர் T20 சர்வதேசப் போட்டிகளில் பந்துவீச்சாளர் ஒருவரின் மிகச்சிறந்த செயல்பாடுகளில் ஒன்றாகவும் அமைந்தது.
மகளிர் T20 சர்வதேசப் போட்டியில் பந்துவீச்சாளர் ஒருவர் 7 அல்லது அதற்கு மேற்பட்ட விக்கெட்டுகளைக் கைப்பற்றிய ஆறாவது நிகழ்வு இதுவாகும்.
டுபாய் சர்வதேச கிரிக்கெட் மைதானத்தில் நேற்றிரவு ஆரம்பமான இப் போட்டியில் முதலில் துடுப்பாட்டம் செய்ய அழைக்கப்பட்ட இலங்கை அணி, இந்தோனேசிய பந்துவீச்சாளர்களின் நெருக்கடிக்கு உள்ளானது.
நடப்புச் சாம்பியனான அந்த அணி 62 ஓட்டங்களுக்கு 6 விக்கெட்டுகளை இழந்து தடுமாறியது.
பின்னர் நிலக்ஷிகா சில்வா 35 பந்துகளில் 50 ஓட்டங்கள் குவித்து அணியின் ஆட்டத்தை மீட்டெடுத்தார்.
அவரது இன்னிங்ஸில் மூன்று பவுண்டரிகளும் ஒரு சிக்ஸரும் அடங்கும்.
இலங்கை அணி தனது 20 ஓவர் ஒதுக்கீட்டில் 124 ஓட்டங்களுக்கு 7 விக்கெட்டுகளை எடுத்தது.
125 ஓட்டங்கள் என்ற இலக்கை நோக்கி பதிலுக்குத் துடுப்பெடுத்தாடிய இந்தோனேசிய அணியால் வலுவான இணைப்பாட்டம் எதையும் அமைக்க முடியவில்லை.
ஏனெனில் இலங்கை அணி ஆட்டத்தின் தொடக்கத்திலிருந்தே ஆக்ரோஷமாகச் செயல்பட்டது.
பவர்பிளேயில், சாமரி அதபத்து தொடக்க ஆட்டக்காரர்களான மரியா கொரசோன் மற்றும் ரஹ்மாவதி பாங்கேஸ்துதி ஆகியோரையும், இந்தோனேசிய வீராங்கனை நி புட்டு ஆயு நந்த சகரினியையும் ஆட்டமிழக்கச் செய்தார்.
இறுதியில், அவர் ஹெட்ரிக் விக்கெட்டுகளை வீழ்த்தி, 18.3 ஓவர்களில் இந்தோனேசியாவை 49 ஓட்டங்களுக்கு ஆட்டமிழக்கச் செய்து ஆட்டத்தை முடித்து வைத்தார்.
காவ்யா கவிந்தி, சுகந்திகா குமாரி மற்றும் கவிஷா தில்ஹரி ஆகியோரும் விக்கெட்டுகளை வீழ்த்தியதால், இலங்கை இந்த ஆசியக் கிண்ணத்தில் தொடர்ச்சியாக இரண்டாவது வெற்றியைப் பதிவுசெய்து.
தற்போது ‘பி’ பிரிவில் இலங்கை அணி முதலிடத்தில் உள்ளமையும் குறிப்பிடத்தக்கது.
