ஸ்பெயினின் கனாரியா தீவுகளில் ஒன்றான கிரான் கனாரியா அருகே, குடியேற்றவாசிகளை ஏற்றிச் சென்ற படகு ஒன்று கடலில் சிக்கலில் சிக்கியதைத் தொடர்ந்து ஏற்பட்ட விபத்தில் சுமார் 80 பேர் உயிரிழந்துள்ளதாக தெரிவிக்கப்பட்டுள்ளது.
குறித்த படகில் சுமார் 128 பேர் பயணித்ததாகவும், படகு ஆபத்தான நிலையில் இருப்பதாக அவசர சேவைப் பிரிவினருக்கு தகவல் கிடைத்ததையடுத்து மீட்புப் பணிகள் முன்னெடுக்கப்பட்டதாகவும் தெரிவிக்கப்படுகிறது.
தகவல் கிடைத்ததும் கடலோரக் காவல்படையினர் மற்றும் அவசரகால மீட்புக் குழுவினர் சம்பவ இடத்திற்கு விரைந்து சென்று மீட்பு நடவடிக்கைகளை மேற்கொண்டனர். எனினும், கடலில் நிலவிய கடினமான சூழ்நிலைகள் காரணமாக பலரைக் காப்பாற்ற முடியாத நிலை ஏற்பட்டதாக கூறப்படுகிறது.
இந்த சம்பவத்தில் உயிரிழந்தவர்களின் எண்ணிக்கை சுமார் 80 ஆக உறுதிப்படுத்தப்பட்டுள்ளதாகவும், மேலும் பலர் காணாமல் போயிருக்கக்கூடும் எனவும் தகவல்கள் தெரிவிக்கின்றன. மீட்கப்பட்டவர்களுக்கு தேவையான மருத்துவ உதவிகள் மற்றும் அவசர சிகிச்சைகள் வழங்கப்பட்டுள்ளன.
ஆப்பிரிக்காவிலிருந்து ஸ்பெயினின் கனாரியா தீவுகளை நோக்கி ஆபத்தான கடல் பயணத்தை மேற்கொள்ளும் குடியேற்றவாசிகளின் எண்ணிக்கை அதிகரித்து வரும் நிலையில், இவ்வாறான படகு விபத்துகளும் தொடர்ந்து இடம்பெற்று வருகின்றன.
இந்த விபத்து தொடர்பில் அதிகாரிகள் மேலதிக விசாரணைகளை முன்னெடுத்து வருவதுடன், உயிரிழந்தவர்களின் அடையாளங்களை உறுதிப்படுத்தும் பணிகளும் நடைபெற்று வருவதாக தெரிவிக்கப்பட்டுள்ளது.
