சர்வதேச கிரிக்கெட்டில் மந்தனா மைல்கல் சாதனை!

ஜப்பானின், நிஷினில் உள்ள கோரோகி ஸ்போர்ட்ஸ் பூங்காவில் இலங்கை அணிக்கு எதிராக நடைபெற்று வரும் ஆசிய விளையாட்டுப் போட்டிகளின் இறுதி ஆட்டத்தில், சர்வதேச கிரிக்கெட்டில் 11,000 ஓட்டங்களை கடந்த முதல் பெண் கிரிக்கெட் வீராங்கனை என்ற மைல்கல்லை இந்தியாவின் ஸ்மிருதி மந்தனா (Smriti Mandhana) எட்டினார்.

அந்த மைல்கல்லை எட்ட வெறும் 13 ஓட்டங்கள் மட்டுமே தேவைப்பட்ட நிலையில் மந்தனா இன்றைய இறுதிப் போட்டிக்கு வந்தார். 

டெஸ்ட், ஒருநாள் மற்றும் டி20 போட்டிகள் என அனைத்திலும் சேர்த்து அவர் மொத்தம் 10,987 ஓட்டங்களை இப் போட்டிக்கு முன்னதாக குவித்திருந்தார்.

இதில் டெஸ்ட் போட்டிகளில் 788 ஓட்டங்களும், ஒருநாள் போட்டிகளில் 5,411 ஓட்டங்களும், டி20 போட்டிகளில் 4,788 ஓட்டங்களும் அடங்கும். 

இன்றைய போட்டியில் இந்தியா முதலில் பேட்டிங் செய்யத் தீர்மானித்த பின்னர், அந்த வரலாற்றுச் சிறப்புமிக்க மைல்கல்லை எட்ட அவர் அதிக நேரம் எடுத்துக்கொள்ளவில்லை.

இந்திய அணியின் துணைத் தலைவர், ஆட்டத்தின் முதல் ஓவரிலேயே இரண்டு பவுண்டரிகளை அடித்துத் தனது இன்னிங்ஸைத் தொடங்கினார்.

பின்னர் மூன்றாவது ஓவரில் ஒரு சிக்ஸரை விளாசி, சர்வதேச அளவில் 11,000 ஓட்டங்களை கடந்த மைல்கல்லை எட்டினார். 

இந்தச் சாதனை, தொடர்ந்து பல சாதனைகளைப் படைத்து வரும் அந்த இடது கை ஆட்டக்காரரின் சிறப்பான பயணத்தில் மற்றொரு முக்கிய அத்தியாயமாக அமைந்தது.

மகளிர் சர்வதேச கிரிக்கெட்டின் அனைத்து வடிவங்களிலும் அதிக ஓட்டங்கள் குவித்தவர் என்ற சாதனையை, இந்திய அணியின் முன்னாள் தலைவர் மிதாலி ராஜிடமிருந்து மந்தனா அண்மையில்தான் தன்வசப்படுத்தினார். 

இந்த மாதத் தொடக்கத்தில் நடைபெற்ற மகளிர் ஆசியக் கிண்ணப் போட்டியில் ஹொங்கொங் அணிக்கு எதிராகச் சிறப்பாக விளையாடி 124 ஓட்டங்களை குவித்ததன் மூலம், மிதாலி ராஜின் 10,868 ஓட்டங்கள் என்ற சாதனையை அவர் முறியடித்தார்.

அப்போது அவரது மொத்த ஓட்டங்களின் எண்ணிக்கை 10,880-ஆக உயர்ந்தது.

30 வயதான இவர், கிரிக்கெட்டின் மிகக் குறுகிய வடிவத்திலும் தொடர்ந்து சாதனைகளைப் படைத்து வருகிறார். 

பங்களாதேஷிக்கு எதிரான ஆசிய விளையாட்டுப் போட்டிகளின் அரையிறுதியில், நியூசிலாந்தின் நட்சத்திர வீராங்கனை சூசி பேட்ஸைப் பின்னுக்குத் தள்ளி, மகளிர் டி20 சர்வதேசப் போட்டிகளில் அதிக ஓட்டங்கள் குவித்த வீராங்கனையாக மந்தனா உருவெடுத்தார்.

இன்றைய போட்டியில் மந்தனா 45 பந்துகளில் 7 சிக்ஸர்கள், 5 பவுண்டரிகள் அடங்கலாக மொத்தமாக 79 ஓட்டங்களை குவித்தமையும் குறிப்பிடத்தக்கது.