தனியார் கூரியர் சேவை மூலமாக இலங்கைக்கு இறக்குமதி செய்யப்பட்டதாகக் கூறப்படும் 3.599 கிலோ ‘குஷ்’ (kush) வகை கஞ்சா மற்றும் 2.409 கிலோ ஹஷீஷ் (hashish) அடங்கிய போதைப்பொருள் கையிருப்பு கைப்பற்றப்பட்டுள்ளது.
தடுப்புக் காவல் உத்தரவின் கீழ் தடுத்து வைக்கப்பட்டுள்ள சந்தேகநபர் ஒருவர் அளித்த தகவலின் அடிப்படையில் இந்த போதைப்பொருள் தொகை மீட்கப்பட்டுள்ளதாக பொலிஸார் குறிப்பிட்டனர்.
போதைப்பொருள் வைத்திருந்த குற்றச்சாட்டின் பேரில், சந்தேகநபர் ஒருவர் செப்டம்பர் 19 அன்று மேல் மாகாண வடக்கு குற்றப் புலனாய்வுப் பிரிவினரால் கைது செய்யப்பட்டார்.
அது தொடர்பான மேலதிக விசாரணைகளுக்காக அவர் அவர் தடுப்புக் காவல் உத்தரவின் கீழ் தடுத்து வைக்கப்பட்டார்.
சந்தேக நபர் அளித்த தகவலின் அடிப்படையில், விசாரணை அதிகாரிகள் சுங்கத்துறை அதிகாரிகளின் உதவியுடன், சுங்கத்துறையின் வசம் இருந்த அந்தப் பொருட்களை மீட்டெடுத்து நேற்று காவல் துறையின் கட்டுப்பாட்டில் கொண்டு வந்தனர்.
மேல் மாகாண வடக்குக் குற்றப் பிரிவு இச்சம்பவம் குறித்து மேலதிக விசாரணைகளை மேற்கொண்டு வருகிறது.
