பணத்திற்காக சட்டவிரோத இணையவழி சூதாட்டத்தில் ஈடுபட்டதாகக் கூறப்படும் எட்டு இந்தியப் பிரஜைகள் தலங்கம பொலிஸாரால் கைது செய்யப்பட்டுள்ளனர்.
தலவத்துகொட பகுதியில் உள்ள ஒரு வீட்டில் தங்கியிருக்கும் சிலர், கணினிகள் மற்றும் கைபேசிகளைப் பயன்படுத்தி சட்டவிரோத இணையவழி சூதாட்டத்தில் ஈடுபடுவதாகக் கிடைத்த தகவலைத் தொடர்ந்து நேற்று (04) முன்தினம் விசாரணைகள் ஆரம்பிக்கப்பட்டதாகப் பொலிஸார் தெரிவித்தனர்.
கடுவெல நீதிவான் நீதிமன்றத்திடமிருந்து பெறப்பட்ட தேடுதல் பிடியாணை உத்தரவு அடிப்படையில் குற்றப் பதிவுப் பிரிவு, குற்றப் புலனாய்வுத் திணைக்களத்தின் (CID) கணினி குற்றங்கள் தொடர்பான விசாரணைப் பிரிவு மற்றும் பொலிஸ் சுற்றுலாப் பிரிவு ஆகியவற்றின் அதிகாரிகள் நேற்று (05) அந்த வீட்டில் சோதனை நடத்தினர்.
அங்கு தங்கியிருந்த எட்டு வெளிநாட்டினருடன், ஆறு கணினிகள், 39 கைபேசிகள் மற்றும் கணினி சார்ந்த பல உபகரணங்களும் கைப்பற்றப்பட்டு, அவர்கள் கைது செய்யப்பட்டனர்.
கைது செய்யப்பட்டவர்கள் 22 முதல் 51 வயதுக்கு இடைப்பட்ட இந்தியப் பிரஜைகள் என்று பொலிஸார் தெரிவித்தனர்.
தலங்கம பொலிஸார் இது தொடர்பான மேலதிக விசாரணைகளை மேற்கொண்டு வருகின்றனர்.
