பிரதமர் பெஞ்சமின் நெதன்யாகு, சிறுபான்மையினத் தலைவர்களுக்கு எதிராகத் தீவிர நடவடிக்கைகளை எடுத்து வரும் நிலையில், அவரைப் பதவியிலிருந்து அகற்றுவதற்காக அரபு கட்சிகளுடன் கூட்டணி அமைக்குமாறு எதிர்க்கட்சிகளை வலியுறுத்தி நூற்றுக்கணக்கான இஸ்ரேலியர்கள் சனிக்கிழைை (ஒக்.31) வீதிகளில் இறங்கிப் போராட்டத்தில் ஈடுபட்டனர்.
கடந்த செவ்வாய்க்கிழமை நடைபெற்ற தேர்தலில், நெதன்யாகுவின் தீவிர வலதுசாரி அரசாங்கம் தங்கள் சமூகத்தை இலக்கு வைத்து முன்வைத்த கருத்துகளால் ஏற்பட்ட ஆத்திரத்தின் விளைவாக, அரபு பெரும்பான்மை கொண்ட கட்சிகள் தேர்தலில் பெரும் முன்னேற்றம் கண்டுள்ளன.
இருப்பினும், எதிர்க்கட்சித் தலைவர் காடி ஐசென்கோட் அவர்களுடன் கூட்டணி அமைப்பது குறித்து இன்னும் எந்த முடிவும் எடுக்கவில்லை.
இருப்பினும், தேர்தலில் ஏற்பட்டுள்ள இழுபறிச் சூழலில், அந்தக் கட்சிகளுடன் கைகோர்ப்பது அவர் அரசாங்கத்தை அமைப்பதற்கு உதவக்கூடும்.
டெல் அவிவில் நடைபெற்ற பேரணி ஒன்றில் கலந்துகொண்ட எதிர்ப்பாளர்களில் ஒருவரான அயேலெட் ராஸ், இஸ்ரேல் மக்கள் தொகையில் சுமார் 20 சதவீதத்தினராக உள்ள அரபு சமூகத்தினருக்கு அரசியல் செயல்பாடுகளில் பங்கேற்க உரிமை உண்டு என்று கூறினார்.
உண்மையான மாற்றத்திற்கான கடைசி வாய்ப்பு இதுதான் என்று கூறிய 60 வயதான அவர், இஸ்ரேலில் நீண்ட காலம் பிரதமராகப் பணியாற்றிய நெதன்யாகு ஒரு மிகச்சிறந்த சூழ்ச்சியாளர் என்று வர்ணித்தார்.
செவ்வாய்க்கிழமை நடைபெற்ற தேர்தலில் எந்தவொரு தரப்பும் இஸ்ரேலின் 120 இடங்களைக் கொண்ட நாடாளுமன்றத்தில் பெரும்பான்மையைப் பெறவில்லை.
எனவே, தேர்தல் முடிவு தெளிவற்றதாகவே அமைந்தது.
நெதன்யாகுவை எதிர்க்கும், யூதர்கள் பெரும்பான்மையாக உள்ள கட்சிகள் 48 இடங்களைக் கைப்பற்றின.
அதே சமயம், அரபு மக்கள் பெரும்பான்மையாக உள்ள ‘ரா ஆம்’ (Raam) மற்றும் ‘ஜொயிண்ட் லிஸ்ட்’ (Joint List) ஆகிய இரு கட்சிகளும் இணைந்து மொத்தம் 19 இடங்களைப் பெற்றன.
இந்த இரு தரப்புகளும் கூட்டணி அமைத்தால், நெதன்யாகுவை எதிர்க்கும் அணி 67 இடங்களுடன் வலுவான பெரும்பான்மையைப் பெற வாய்ப்புள்ளது.
இருப்பினும், எதிர்க்கட்சி அணியில் உள்ள சில கட்சிகள் இந்த யோசனையை எதிர்க்கின்றன.
ராஆம் கட்சியின் தலைவர் மன்சூர் அப்பாஸ், 2021 முதல் 2022 வரை நீடித்த ஒரு குறுகிய கால கூட்டணியில் இணைந்தபோது, அரபு கட்சிகள் ஒரே ஒரு முறை மட்டுமே இஸ்ரேலிய அரசாங்கத்தில் முறையாக இடம் பிடித்துள்ளன.
மீண்டும் அவ்வாறு செய்ய அவர் விருப்பம் தெரிவித்துள்ளார்.
இதற்கிடையில், ஜொயிண்ட் லிஸ்ட் கட்சியின் யூசெஃப் ஜபாரீன், காசாவில் நடக்கும் போர் உள்ளிட்ட கவலைகளைக் காரணம் காட்டி, ஐசன்கோட்டின் அரசாங்கத்தில் சேராமல் நாடாளுமன்றத்தில் அவருக்கு ஆதரவளிக்கத் தயாராக இருப்பதாக கூறியுள்ளதாக ஏஎஃப்பி செய்தி நிறுவனம் தெரிவித்துள்ளது.
