கல்விப் பொதுத் தராதர சாதாரண தரப் பரீட்சையை இலக்காகக்கொண்டு மலையகக் கல்வி அபிவிருத்தி மன்றத்தின் தயாரிப்பில் உருவான
தமிழ், ஆங்கிலம், கணிதம் மற்றும் விஞ்ஞானம் ஆகிய பாடங்களை உள்ளடக்கிய மாதிரி வினாத்தாள்கள் அடங்கிய கையேட்டின் வெளியீட்டு நிகழ்வு எதிர்வரும் 05 ஆம் திகதி இடம்பெறவுள்ளதாக மன்றம் உத்தியோகபூர்வமாக அறிவித்துள்ளது.
க.பொ.த. சாதாரண தரப் பரீட்சைக்கு மாணவர்களைத் தயார்படுத்தும் நோக்கில், தகுதிவாய்ந்த ஆசிரியர்களின் வழிகாட்டலில் விசேட கல்விச் செயற்றிட்டத்தின் முன்னெடுப்பில் இம்முறை 20000 கையேடுகள் தயாரிக்கப்பட்டிருப்பதாக மன்றத்தின் பரீட்சைகள் மற்றும் கருத்தரங்குப் பொறுப்பாளர் பாலா சுரேஷ் குமார் தெரிவித்துள்ளார்.
இது குறித்து அவர் மேலும் தெரிவித்துள்ளதாவது,
மலையக மாணவர்களின் கல்வி முன்னேற்றத்தையும் பரீட்சைகளின் அடைவுமட்டத்தையும் மேம்படுத்தும் நோக்கில், மலையக கல்வி அபிவிருத்தி மன்றம் பல்கோண செயற்றிட்டங்களை முன்னெடுத்து வருகிறது.
அதன் வரிசையில் வருடந்தோறும் தரம் 11 மாணவர்களுக்கான கல்விக் கருத்தரங்குகளை இலக்காகக் கொண்டு மாதிரி வினாத்தாள்கள் தயாரித்து வழங்கி வருகிறது.
வருடாந்தம் முன்னெடுக்கப்படும் இத்திட்டத்தின் கீழ், இம்முறையும் பரீட்சைக்குத் தோற்றவுள்ள மாணவர்கள் சிறந்த முறையில் தயாராகும் வகையில், கணிதம், விஞ்ஞானம், ஆங்கிலம், தமிழ் உள்ளிட்ட முக்கிய பாடங்களுக்கான 20,000க்கும் மேற்பட்ட மாதிரி வினாத்தாள்களை விநியோகிப்பதற்கான நடவடிக்கைகள் முன்னெடுக்கப்பட்டுள்ளன.
தகுதிவாய்ந்த மற்றும் அனுபவமிக்க ஆசிரியர்களின் வழிகாட்டலில் தயாரிக்கப்பட்டுள்ள இவ்வினாத்தாள்கள், மாணவர்களின் பாட அறிவை மதிப்பிடுவதற்கும், பரீட்சை வினாக்களை எதிர்கொள்ளும் திறனை வளர்ப்பதற்கும், நேர முகாமைத்துவத்தை மேம்படுத்துவதற்கும் உதவும் வகையில் தயாரிக்கப்பட்டுள்ளமை குறிப்பிடத்தக்க அம்சமாகும்.
மேலும், மாணவர்கள் பரீட்சைக்கு முன்னதாகத் தமது கற்றல் அடைவுகளை மதிப்பீடு செய்து, தங்களுக்குக் கூடுதல் பயிற்சி தேவைப்படும் பாடப்பகுதிகளை அடையாளம் காண்பதற்கும் இம்மாதிரி வினாத்தாள்கள் துணைபுரியும் என எதிர்பார்க்கப்படுகிறது.
வழமையான நடைமுறைகளுக்கு அமைய இவ்வினாத்தாள்கள் உரிய பாடசாலைகளுக்கு விநியோகிக்கப்படவுள்ளன.
விண்ணப்பித்துள்ள அனைத்துப் பாடசாலைகளுக்கும் உரிய நேரத்தில் கையேடுகள் கிடைக்கப்பெறும் அதேவேளை பின்னர் குறித்த பாடசாலைகளில் கருத்தரங்குகள் இடம்பெறும்.
மலையக மாணவர்களின் எதிர்காலம் கருதிய ஆசிரியர்களின் அர்ப்பணிப்புக்களை மலையகக் கல்வி அபிவிருத்தி மன்றம் நன்றியோடு நினைவுகூர்வதுடன் பரீட்சைக்குத் தோற்றும் மாணவச் செல்வங்களுக்கு வாழ்த்துக்களையும் தெரிவித்துக்கொள்கிறது எனக் குறிப்பிட்டுள்ளார்.
மேலதிக விபரங்களுக்கு
0777305450, 0774497234, 0779569355
