காங்கிரஸின் கட்டுப்பாடு யாருக்கு? – அமெரிக்க இடைத்தேர்தல் இன்று!

அமெரிக்கா முழுவதும் 230 மில்லியனுக்கும் அதிகமான தகுதியுள்ள வாக்காளர்கள், காங்கிரஸில் தங்களைப் பிரதிநிதித்துவப்படுத்துபவரைத் தீர்மானிக்க செவ்வாய்க்கிழமை (03) அன்று வாக்களிக்கவுள்ளனர்.

பிரதிநிதிகள் சபையின் அனைத்து 435 இடங்களுக்கும், செனட் சபையின் 100 இடங்களில் 35 இடங்களுக்கும் தேர்தல் நடைபெறுகிறது. 

மேலும், 36 மாநிலங்களில் வாக்காளர்கள் ஆளுநர்களைத் தேர்ந்தெடுக்க உள்ளனர்.

தற்போது இரு அவைகளிலும் குடியரசுக் கட்சியினரே பெரும்பான்மையைக் கொண்டுள்ளனர்.

வாக்குப்பதிவு எந்த நேரத்தில் தொடங்குகிறது?

வாக்கெடுப்பு நேரங்கள் அந்தந்த மாநிலங்களால் தீர்மானிக்கப்பட்டு நிர்ணயிக்கப்படுகின்றன.

வெர்மான்ட் மாநிலத்தில் உள்ளூர் நேரப்படி காலை 5 மணிக்கு (10:00 GMT) வாக்குப்பதிவு தொடங்குகிறது. 

நியூ ஜெர்சி, வர்ஜீனியா, கனெக்டிகட் மற்றும் கென்டக்கி ஆகிய மாநிலங்களில் உள்ளூர் நேரப்படி காலை 6 மணிக்கு (11:00 GMT) வாக்குப்பதிவு தொடங்கும்.

ஜோர்ஜியா, புளோரிடா, பென்சில்வேனியா மற்றும் நியூயார்க் மாநிலங்களில் உள்ளூர் நேரப்படி காலை 6 மணிக்கும் (11:00 GMT) காலை 7 மணிக்கும் (12:00 GMT) இடைப்பட்ட நேரத்தில் வாக்குப்பதிவு தொடங்கும்.

ஓஹியோ மற்றும் வட கரோலினாவில் உள்ளூர் நேரப்படி காலை 6:30 மணிக்கு (11:30 GMT) வாக்குப்பதிவு தொடங்கும்.

மிச்சிகன் மாநிலத்தில், காலை 7 மணிக்கு (12:00 GMT) வாக்குப்பதிவு தொடங்கும்.

வாக்குப்பதிவு எந்த நேரத்தில் முடிவடையும்?

நாடு முழுவதும் வாக்குப்பதிவு வெவ்வேறு நேரங்களில் நிறைவடைகிறது.

இந்தியானா மற்றும் கென்டக்கி மாநிலங்களில் உள்ளூர் நேரப்படி மாலை 6 மணிக்கு (GMT 23:00) வாக்குப்பதிவு முதலில் முடிவடைகிறது.

மிச்சிகனில் உள்ளூர் நேரப்படி இரவு 8 மணிக்கும், கன்சாஸில் இரவு 7 மணிக்கும் (இரண்டுமே புதன்கிழமை GMT 01:00 மணிக்கு) வாக்குப்பதிவு நிறைவடைகிறது.

அதேபோல், அயோவாவில் உள்ளூர நேரப்படி இரவு 8 மணிக்கு (புதன்கிழமை GMT 02:00 மணிக்கு) வாக்குப்பதிவு முடிவடைகிறது.

அலாஸ்காவில் வாக்குப்பதிவு மிக இறுதியாக, புதன்கிழமை கிழக்கு நேரப்படி அதிகாலை 1 மணிக்கு (GMT 06:00 மணிக்கு) நிறைவடைகிறது.

முடிவுகள் எப்போது தெரியும்?

வாக்குப்பதிவு முடிவடையத் தொடங்கும் நிலையில், செவ்வாய்க்கிழமையன்று (03) முதல் முடிவுகள் வரத் தொடங்கலாம்.

செவ்வாய்க்கிழமை மாலை முழுவதும் முடிவுகள் வந்துகொண்டே இருக்கும்.

மேலும் சில மாநிலங்களில் வாக்குப்பதிவு நிறைவடைந்து, அதிகாரிகள் வாக்கு எண்ணிக்கையை வெளியிடத் தொடங்குவதால், புதன்கிழமையும் (04) முடிவுகள் வரக்கூடும்.

இருப்பினும், முதலில் வெளியாகும் முடிவுகளைக் கொண்டே வெற்றியாளர் அறிவிக்கப்பட்டுவிட்டார் என்று அர்த்தமாகாது.

வாக்குகள் எண்ணப்படும்போது தேர்தல் அதிகாரிகள் வாக்கு எண்ணிக்கையை வெளியிடுகின்றனர்.

அதே நேரத்தில் அசோசியேட்டட் பிரஸ் போன்ற செய்தி நிறுவனங்கள் முடிவுகளைப் பகுப்பாய்வு செய்து, ஒரு போட்டியின் முடிவை எப்போது அறிவிக்கலாம் என்பதைத் தீர்மானிக்கின்றன.

கடுமையாகப் போட்டியிடப்படும் போட்டிகளின் முடிவை அறிவிக்க பல மணிநேரங்கள் அல்லது பல நாட்கள் கூட ஆகலாம். 

எந்தக் கட்சி காங்கிரஸைக் கட்டுப்படுத்தும் என்பது உடனடியாகத் தெளிவாகத் தெரியாமல் போகலாம்.

செவ்வாய்க்கிழமை நடைபெறும் இடைத்தேர்தலில், ஜனாதிபதி டொனால்ட் ட்ரம்பின் இரண்டாவது பதவிக்காலத்தின் முதல் இரண்டு ஆண்டுகள் குறித்த தீர்ப்பை அமெரிக்க வாக்காளர்கள் வழங்குவார்கள். 

இத்தேர்தல்களில், குடியரசுக் கட்சியினரிடமிருந்து பிரதிநிதிகள் சபையை ஜனநாயகக் கட்சியினர் கைப்பற்றுவார்கள் என கருத்துக் கணிப்புகளும் நடுநிலை ஆய்வாளர்களும் சாதகமாக இருக்கும் நிலையில், செனட் சபையின் கட்டுப்பாடு நிச்சயமற்றதாகவே உள்ளது.

செனட் சபைக்கான போட்டி, குடியரசுக் கட்சியின் செல்வாக்கு மிகுந்த பகுதிகள் உட்பட கடும் போட்டி நிலவும் சுமார் 10 மாநில அளவிலான தேர்தல்களில் நடைபெற்று வருகிறது.

வரலாறு ட்ரம்பின் குடியரசுக் கட்சிக்கு எதிராகவே உள்ளது.

இரண்டாம் உலகப் போருக்குப் பிந்தைய இடைக்காலத் தேர்தல்களில், இரண்டைத் தவிர மற்ற அனைத்துத் தேர்தல்களிலும், பதவியில் இருக்கும் ஜனாதிபதியின் கட்சி நாடாளுமன்றத்தில் பின்னடைவைச் சந்தித்துள்ளது. 

ஈரானுடனான போர் மற்றும் அதன் விளைவாக எரிபொருள் விலை உயர்வு ஆகியவற்றால் வாக்காளர்கள் மத்தியில் ஏற்பட்டுள்ள கடும் அதிருப்தி காரணமாக, ட்ரம்பின் செல்வாக்கு மதிப்பீடு இதுவரை இல்லாத அளவுக்கு மிகக் குறைந்த அளவை நெருங்கியுள்ளது.

இந்த ஆண்டுத் தேர்தல் முழுவதுமாக ட்ரம்ப்பைச் சுற்றியே அமையும் என்பதில் சந்தேகமில்லை.

கடந்த பத்தாண்டுகளில் அமெரிக்க அரசியலில் அவர் மிக முக்கியமான நபராக இருந்து வருகிறார். 

கடந்த ஒக்டோபர் மாதத் தொடக்கத்திலிருந்து, குடியரசுக் கட்சியின் ஜனாதிபதி ட்ரம்ப் இருபதுக்கும் மேற்பட்ட பிரச்சாரக் கூட்டங்களை நடத்தி தனது ஆதரவாளர்களை உற்சாகப்படுத்த முயன்றுள்ளார். 

இதில் பெரும்பாலான கூட்டங்கள், கடந்த தேர்தலில் அவர் எளிதாக வெற்றி பெற்ற மாநிலங்களிலேயே நடத்தப்பட்டுள்ளன.

இது குடியரசுக் கட்சியினர் தற்போது தற்காப்பு நிலையில் இருப்பதையே காட்டுகிறது.

ட்ரம்ப் தலைமையிலான குடியரசுக் கட்சியினர், ஜனநாயகக் கட்சி வேட்பாளர்களை தீவிரவாதிகள் என்றும், அமெரிக்க விழுமியங்களுக்கு எதிரானவர்கள் என்றும், ஏன் கம்யூனிஸ்டுகள் என்றும் சித்தரித்துள்ளனர்.

இருப்பினும், வாழ்க்கைச் செலவு மற்றும் பொருட்களின் விலை குறித்த கவலையே வாக்காளர்களிடையே மேலோங்கி உள்ளது. 

ட்ரம்ப் அமுல்படுத்திய விரிவான வரி விதிப்புக் கொள்கைகள் மற்றும் பெப்ரவரி மாதம் ஈரான் மீது தாக்குதல் நடத்த எடுத்த முடிவு ஆகியவற்றால் உள்நாட்டில் செலவுகள் அதிகரித்துள்ளன.

இந்த விவகாரத்தை அவர் கையாண்ட விதத்தை வாக்காளர்கள் விரும்பவில்லை. இதற்கிடையில், முழுமையான விசுவாசத்தை எதிர்பார்ப்பவரும், தனது தவறுகளை அரிதாகவே ஒப்புக்கொள்பவருமான ஜனாதிபதியிடமிருந்து தங்களை விலக்கிக்கொள்ள குடியரசுக் கட்சி வேட்பாளர்கள் பெரும் சிரமப்படுகின்றனர் என்பதும் குறிப்பிடத்தக்கது.