அரிய மண் கனிமங்கள் உள்ளிட்ட முக்கிய கனிமங்களின் விநியோகத்தில் சீனாவை அதிகளவில் சார்ந்திருப்பதால், பிரிட்டனின் பொருளாதார மற்றும் தேசியப் பாதுகாப்புக்கு ஆபத்து ஏற்படக்கூடும் என அந்நாட்டு நாடாளுமன்றக் குழு எச்சரித்துள்ளது.
பாதுகாப்புத் தொழில்நுட்பங்கள், மின்கலங்கள், செயற்கை நுண்ணறிவு மற்றும் புதுப்பிக்கத்தக்க எரிசக்தித் துறைகளுக்கு இந்தக் கனிமங்கள் அத்தியாவசியமானவையாகும்.
உலகின் 20 முக்கிய மூலோபாயக் கனிமங்களில் 19 கனிமங்களைச் சுத்திகரிப்பதில் சீனா முன்னிலை வகிப்பதாக சர்வதேச எரிசக்தி முகமையின் தரவுகளை நாடாளுமன்ற அறிக்கை சுட்டிக்காட்டியுள்ளது.
இதனால் விநியோகத் தடைகள் அல்லது ஏற்றுமதிக் கட்டுப்பாடுகள் ஏற்பட்டால் பிரிட்டனின் உற்பத்தித்துறை பாதிக்கப்படலாம் எனவும் எச்சரிக்கப்பட்டுள்ளது.
இதற்குத் தீர்வாக உள்நாட்டு கனிம அகழ்வு, சுத்திகரிப்பு மற்றும் மறுசுழற்சியை விரிவுபடுத்துவதுடன், நட்பு நாடுகளுடன் இணைந்து மாற்று விநியோக வலையமைப்புகளை உருவாக்குமாறும் நாடாளுமன்றக் குழு பரிந்துரைத்துள்ளது.
