தெற்கு போலந்தின் கிராகோவ் (Krakow) நகரின் மையப்பகுதியில் நடந்த துப்பாக்கிச் சூட்டுச் சம்பவத்தில், பொலிஸ் அதிகாரிகள் மற்றும் வெளிநாட்டினர் உட்பட குறைந்தது ஆறு பேர் உயிரிழந்ததுடன், 15 பேர் காயமடைந்தனர்.
உள்ளூர் நேரப்படி சனிக்கிழமை பிற்பகல் 3 மணியளவில் (14:00 GMT) ஒருவர் தனது வாகனத்தில் நகரின் முதன்மைச் சந்தைச் சதுக்கத்திற்குள் (Main Market Square) நுழைந்து, “தனது வாகனத்திலிருந்தபடியே அங்கிருந்த மக்கள் மீது கண்மூடித்தனமாகச் சுடத் தொடங்கினார்” என்று காவல்துறையினர் தெரிவித்தனர்.
இதில் நான்கு பெண்களும் இரண்டு ஆண்களும் கொல்லப்பட்டனர்.
தாக்குதலில் ஈடுபட்ட நபர் தனியாகவே செயல்பட்டதாகவும், அவரை பொலிஸார் சுட்டுப் பிடித்துள்ளதாகவும் காவல்துறை தெரிவித்துள்ளது.
காயமடைந்த அவர், சிகிச்சைக்காக மருத்துவமனைக்குக் கொண்டு செல்லப்பட்டுள்ளார்.
போலந்து காவல்துறைத் தலைவர் மாரெக் போரோனின் (Marek Boron) தகவல்படி, உயிரிழந்தவர்களில் பிரித்தானியர் ஒருவர் அடங்குவார்.
மேலும், மருத்துவமனையில் சிகிச்சை பெற்று வருபவர்களில் ஐந்து வெளிநாட்டினரும் உள்ளனர்.
பாதிக்கப்பட்டவர்களில் இருவரை இன்னும் அடையாளம் காண முடியவில்லை என்று கூறியுள்ள போரோன், பாதிக்கப்பட்ட அனைவரின் தேசிய இன விவரங்களையும் அதிகாரிகள் இன்னும் வெளியிடவில்லை என்றார்.
