நியூசிலாந்து மண்ணில் இந்தியா வரலாற்று வெற்றி!

இந்த தசாப்தத்தில், நியூசிலாந்தின் சொந்த மண்ணிலேயே அவர்களுக்கு எதிராக ஒருநாள் தொடர் வெற்றியைப் பதிவு செய்த முதல் அணியாக இந்தியா உருவெடுத்துள்ளது. 

ஞாயிற்றுக்கிழமை (15) மவுண்ட் மவுங்கானுயில் உள்ள பே ஓவலில் நடைபெற்ற ஆட்டத்தில், நியூசிலாந்தை 22 ஒட்டங்கள் வித்தியாசத்தில் இந்தியா வீழ்த்தியது. 

போட்டியில் முதலில் துடுப்பாட்டம் செய்த இந்தியா, தடுமாற்றமான ஆட்டத்தை வெளிப்படுத்தி 209 ஓட்டங்களுக்கு அனைத்து விக்கெட்டுகளையும் இழந்தது. 

இருப்பினும், அபாரமான பந்துவீச்சை வெளிப்படுத்திய இந்திய அணி, நியூசிலாந்தை 187 ஓட்டங்களுக்குள் சுருட்டி, 3-1 என்ற கணக்கில் மறக்க முடியாத தொடர் வெற்றியை உறுதி செய்தது.

இந்தப் போட்டியில் இந்தியா தனது இன்னிங்ஸைத் மீண்டும் ஒருமுறை மோசமாகத் தொடங்கியது; ரோஹித் சர்மா இந்தத் தொடர் முழுவதிலும் வெறும் 30 ஓட்டங்கள் மட்டுமே எடுத்த நிலையில், இந்த முறையும் ஓட்டம் ஏதும் எடுக்காமல் ஆட்டமிழந்தார். 

அவரைத் தொடர்ந்து விராட் கோலியும் ருதுராஜ் கெய்க்வாடும் ஆட்டமிழக்க, இந்தியா 34 ஓட்டங்களுக்குள் 3 விக்கெட்டுகளை இழந்து தடுமாறியது.

அணி அழுத்தத்தில் இருந்த சூழலில், ஸ்ரேயாஸ் ஐயர் (22 ஓட்டங்கள், 26 பந்துகள், 3 பவுண்டரிகள்) மற்றும் அக்சர் படேல் (46 ஓட்டங்கள், 58 பந்துகள், 5 பவுண்டரிகள், 1 சிக்ஸர்) ஆகியோர் நான்காவது விக்கெட்டுக்கு 52 ஓட்டங்களைச் சேர்த்து, இன்னிங்ஸிற்கு ஓரளவு நிலைத்தன்மையைக் கொடுத்தனர். 

இருப்பினும், முக்கியமான கட்டத்தில் ஸ்ரேயாஸ் ஐயர் ஆட்டமிழந்ததால், அவர்களால் நீண்ட நேரம் கூட்டணியைத் தொடர முடியவில்லை. 

மறுபுறம், இஷான் கிஷன் (46 ஓட்டங்கள், 58 பந்துகள், 3 பவுண்டரிகள், 2 சிக்ஸர்கள்) பேட்டிங்கில் உறுதியாகச் செயல்பட்டு, இந்திய அணியின் ஓட்டம் தொடர்ந்து உயர்வதற்கு முக்கியப் பங்களிப்பை வழங்கினார்.

நமன் தீர் (22 ஓட்டம் :31 பந்துகள், 2 பவுண்டரிகள்) ஆட்டத்தின் வேகத்தை அதிகரிக்க முயன்றார், ஆனால் நியூசிலாந்து அணி அவ்வப்போது விக்கெட்டுகளை வீழ்த்திக்கொண்டே இருந்தது. 

இந்திய அணி 183 ஓட்டங்களுக்கு 9 விக்கெட்டுகளை இழந்து தடுமாறிய நிலையில், 200 ஓட்டங்களைக் கூட எட்டாது என்று தோன்றியது. 

இருப்பினும், இறுதியில் அர்ஷ்தீப் சிங் மற்றும் மொஹமட் சிராஜ் ஆகியோர் சில அதிரடி ஷாட்களை விளையாடியதன் மூலம், இந்திய அணியின் ஓட்ட எண்ணிக்கையை 209 ஓட்டங்களாக உயர்த்தினர்.

இரண்டாவது இன்னிங்ஸில், இந்தியப் பந்துவீச்சாளர்கள் ஆரம்பத்திலிருந்தே மிகக் கட்டுக்கோப்பாகப் பந்துவீசினர். 

டிம் சீஃபர்ட் முதலில் ஆட்டமிழந்தார். அதனைத் தொடர்ந்து, வில் யங் (22 ஓட்டங்கள், 42 பந்துகள், 3 பவுண்டரிகள்) மற்றும் நிக் கெல்லி (24 ஓட்டங்கள், 45 பந்துகள், 2 பவுண்டரிகள்) ஆகியோர் நிலைத்து நின்று ஆட முயன்றனர்.

ஆனால் அர்ஷ்தீப் சிங் அவர்களை வீழ்த்தினார். 

மொஹமட் சிராஜும் சிறப்பாகப் பந்துவீச, நியூசிலாந்து அணி 83 ஓட்டங்களுக்கு 4 விக்கெட்டுகளை இழந்து தடுமாறியது.

டீன் ஃபாக்ஸ்க்ராஃப்ட் (31 ஓட்டங்கள், 33 பந்துகள், 5 பவுண்டரிகள்) மற்றும் மைக்கேல் பிரேஸ்வெல் (19 ஓட்டங்கள், 33 பந்துகள், 2 பவுண்டரிகள்) ஆகியோர் 36 ஓட்ட இணைப்பாட்டத்தை அமைத்து இந்திய அணிக்கு நெருக்கடி கொடுத்தனர். 

அதன் பிறகு, அகிப் நபி மற்றும் யாஷ் தாக்கூர் ஆகியோர் அடுத்தடுத்து இரண்டு விக்கெட்டுகளை வீழ்த்தி, இந்திய அணியை மீண்டும் ஆட்டத்திற்குள் கொண்டு வந்தனர். 

மிட்செல் சான்ட்னர் (24 ஓட்டம், 31 பந்துகள், 1 பவுண்டரி, 2 சிக்ஸர்கள்) தனது அணியை வெற்றிப் போட்டியில் தக்கவைக்க முயற்சித்தார், ஆனால் ஐயரின் மிகச்சிறந்த பந்துவீச்சு மாற்றங்கள் நியூசிலாந்து அணிக்கு பெரும் சவாலாக அமைந்தன.

இறுதியாக நியூசிலாந்தின் இன்னிங்ஸை 187 ரன்களுக்கு முடிவுக்குக் கொண்டுவந்த இந்தியா, அந்தப் போட்டியில் 22 ஓட்டங்கள் வித்தியாசத்தில் வெற்றி பெற்று, தொடரை 3-1 என்ற கணக்கில் தன்வசப்படுத்தியது.